DILI, 16 junu 2023 (TATOLI)—Prezidente Parlamentu Nasionál (PPN), Aniceto Longinhos Guterres Lopes, husu Deputadu sira iha lejislatura dalimak ne’ebé la re-eleitu ba lejislatura daneen atu entrega hikas karreta ne’ebé durante ne’e sira utiliza.
Notísia Relevante: PN kansela halo lelaun ba karreta Prado
“Karreta hotu-hotu Parlamentu nian ne’e Estadu nian, tanba ne’e se nia (Deputadu) la re-eleitu termina nia mandate, nia tenke entrega karreta. Agora, sira balun entrega ne’e sira la re-eleitu, se la re-eleitu klaru tenke entrega. Soké balun uza fali ida-ne’e sai fali nia mak loos liu tanba nia la re-eleitu nia tenke entrega, laiha dalan seluk,” Prezidente PN ne’e hateten ba jornalista sira iha uma fukun PN, sesta ne’e.
Prazu ba deputadu sira-ne’ebé la re-eleitu to’o loron 21 juñu tinan ne’e tenke entrega fali ona karreta Peado ne’ebé durante ne’e uza hodi hala’o serbisu iha lejislatura dalimak.
“Nia mandatu kuandu termina iha inísiu lejislatura (deputadu) ida-idak tenke hatene aan to’o dia 21 juñu hatama hotu ona. Tanba, lejislatura foun inísia iha 22 juñu, mandatu Deputadu termina kuandu lejislatura foun inísia,” nia hateten.
Nia hatutan, Deputadu sira-ne’ebé re-eleitu iha direitu nafatin uza karreta PN nian, ida-ne’e mak seidauk entrega. Se intrega sei iha alterasaun lei ruma, tanba lei prevee Deputatu iha direitu ba viatura,
Enkuantu, iha loron 15 juñu 2023 Deputadu hosi bankada FRETILIN, José Agostinho Sequeira ‘Somotxo’, entrega ona karreta Pajero Sport ho xapa matrikula MP 88-55 ba PN molok mandatu ramata, no karreta ne’e durante ne’e nia uza hala’o serbisu iha lejislatura dalimak.
Jornalista : Nelson de Sousa
Editór : Cancio Ximenes
