iklan

EKONOMIA, HEADLINE

SEFOPE sei fó sai rezultadu balu ba aplikante 55.436 iha tempu badak

SEFOPE sei fó sai rezultadu balu ba aplikante 55.436 iha tempu badak

Diretór Nasionál Empregu Exteriór SEFOPE, Filomeno Soares. Imajen Tatoli/Francisco Sony

DILI, 16 juñu 2023 (TATOLI)—Sekretaria Estadu Formasaun Profisionál no empregu (SEFOPE) liuhosi Diresaun Nasionál Empregu Exteriór (DNEE) iha tempu badak sei fó rezultadu balun hosi kandidatu traballadór foun atu bá serbisu iha Austrália, ne’ebé foin lalais aplika hamutuk 55.436.

Diretór Nasionál Empregu Exteriór SEFOPE, Filomeno Soares, hateten, loloos rezultadu ba aplikante ne’e fó sai antes, maibé tanba númeru aplikante boot, tanba ne’e ekipa daudaun kontinua haree ka fitru hela.

“Ha’u orienta ona ekipa iha tempu molok mandatu VIII Governu ramata, posível hosi aplikante 55.436 ne’e ita públika daudaun ona naran balun ne’ebé filtru ona ho objetivu atu fó resposta ba demanda hosi Austrália ne’ebé kontinua mai tanba ita-nia kandidatu traballadór sira-nia naran iha sistema hahú menus ona, entaun ita labele hein ramata mak fó sai dala-ida,” Diretór hateten iha Timor Lodge, Comoro, sesta ne’e.

Notísia relevante : SEFOPE sei halo levantamentu dadus ba eis-traballadór Austrália no Koreia Súl

Nia dehan, naran aplikanti balun fó sai agora, maibé Seluk hein fali Governu foun mai mak kontinua fó sai rezultadu tanba daudaun ne’e ekipa kontinua halo esforsu.

Rekrutamentu foun ba traballador Austrália ne’e liuhosi prosesu online, ne’ebé hala’o hahú iha loron 06 marsu 2023 no ramata iha loron 17 marsu 2023, ho objetivu fó oportunidade ba timor-oan hotu bele partisipa hodi bá serbisu iha Austrália.

Nune’e, aplikante ne’ebé liu hamutuk 55.436, kompostu hosi mane 34.425 no feto 21.011.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!