VIQUEQUE, 16 juñu 2023 (TATOLI)—Sentru Saúde postu Ossu, munisípiu Viqueque hasoru difikuldade fatin laboratóriu la sufisiente atu halo servisu.
“Ami presiza atu extende tan fatin laboratóriu iha Sentru Saúde Ossu hodi pesoál saúde sira uza,” Xefe Sentru Saúde postu Ossu, Elsa Esperansa Monteiro, informa ba Agência Tatoli, iha postu Viqueque Vila, sesta ne’e.
Nune’e mós, nia husu parte relevante sira atu halo manutensaun ba transporte motorizada.
“Se bele oferese transporte ne’ebé di’ak hodi pesoál saúde sira uza hodi servisu ba programa tubekoloze iha postu Ossu. Atividade x-ray ne’ebé hala’o iha postu administrativu konsege deteta abitante pozitivu hamutuk na’in-42 ne’ebé daudaun ne’e tuir hela programa hemu ai-moruk,” nia akresenta.
Notísia relevante : Sentru saúde Ossu rejista ISPA 2.000 iha janeiru to’o agostu
Iha fatin ketak, Xefe Sentru Saúde Uatucarbau, Jeremias Mota, hateten, daudaun ne’e rekursu umanu pesoál saúde menus.
“Doutór no analista laiha hodi halo atendimentu ba populasaun iha postu Uatucarbau. Daudaun ami-nia analista na’in-ida maibé analista ne’e foin lalais tuir texte liu, ne’ebé atu ba tan eskola, karik nia ba tiha eskola ami laiha ona pesoál analista, tanba ne’e ami rekomenda ba parte relevante atu rekruta analista ida hodi substitui ba analista ne’ebé atu ba eskola,” nia hato’o.
Nune’e mós, Diretór Servisu Saúde Viqueque, Pedro da Silva Pereira, dehan, edifísiu saúde iha munisípiu Viqueque maioria hanesan obra tuan ne’ebé iha ona hosi tempu okupasaun Indonézia, nune’e fatin sira ne’e ho kondisaun a’at no infraestrutura la kompletu.
“Espera ba oin bele kompleta hodi fó atendimentu ba populasaun Viqueque. Kondisaun fatin saúde sira ne’ebé daudaun iha Viqueque ne’e harii hosi tempu Indonézia, fatin balun laboratóriu fatin klot tebes, nune’e mós menus tékniku laboratóriu maibé ha’u fiar katak tempu badak ita bele rezolve problema sira-ne’e,” nia otimista.
Jornalista : Vitorino Lopes da Costa
Editora : Julia Chatarina
