DILI, 18 juñu 2023 (TATOLI) – Isabel Ferreira nu’udar espoza hosi Primeiru-Ministru, Taur Matan Ruak fila hikas ona ba mundu seluk tanba sofre kankru intestinu, iha rezidénsia Metiaut, Dili.
“Ami hosi ekipa médika Ospitál Nasionál Guido Valadares ne’ebé hetan diretiva hosi Ospitál nasionál Guido Valadares ne’ebé durante ne’e fó apoia asisténsia médika ba señora Isabel da Costa Ferreira hakarak informa ba ita hotu katak señora Isabel Ferreira hakotu ona iis iha oras 20:48 otl, Isabel Ferreira durante ne’e sofre moras kankru intestinu estadium terminadu”, João Teodoro Amaral espesialista onkolojia iha HNGV haktuir liuhosi pajina ofisiál Primeiru-Ministru, Taur Matan Ruak, domingu-kalan.
Biografia Isabel Ferreira
Isabel da Costa Ferreira, espoza hosi atuál Primeiru-Ministru, Taur Matan Ruak, ne’ebé moris iha Same, munisípiu Manufahi hosi aman Mateus Ferreira no inan Ana Flora de Jesus Ferreira, hosi munisípiu ne’ebé Don Boaventura halo revolta hasoru kolonializmu portugés.
Alumni Universidade Nasionál Denpasar, Bali, Indonézia ne’ebé termina ninia lisensiatura direitu iha 1998, ho maun-alin hamutuk 13, hahú kareira profisionál ba kestaun sira ne’ebé liga direitu ema-nian, liu-liu violasaun ne’ebé komete hosi militár Indonézia durante okupasaun.
Inan ho oan na’in-tolu (3) ne’e moris iha loron 15 fulan-abríl 1974, asume responsabilidade hanesan koordenadora jerál ba organizasaun la’ós governu-nian ho naran Kontras Timor-Timur iha 1998 no 1999, asume mós kargu hanesan diretora ba Komisaun Direitu Humanus Timor Lorosa’e (CDHTL, sigla portuges) iha 1999-2021.
Autora ida hosi ema nain 88, ne’ebé elabora konstituisaun Repúblika Demokratika Timor-Leste hosi lista partidu Uniaun Demokrata Timorense (UDT), eleitu nu’udar membru asembleia konstituante iha 2001.
Depois restaurasaun independensia, iha tempu tranzisaun administrativa Nasaun Unida iha Timor-Leste (UNTAET), espoza eis Prezidente Repúblika dalima iha periódu 2012-2017 ne’e nu’udar vise prezidente Cruz Vermelha Timor-Leste (CVTL) hosi 2002–2005, hanesan asesora direitu ema-nian ba primeiru-ministru hosi 2002–2006, asume mós knaar importante iha governasaun nu’udar, vise ministra ba justisa iha agostu–dezembru 2006, no membru komisaun verdade no amizade (CVA, sigla portugés) iha 2005–2008.
Espoza eis prezidente repúblika ba datoluk ne’ebé eleitu demokratikamente ne’e, hetan konfiansa hanesan prezidente sekretariadu ba apoiu komisaun ba promosaun PNTL hosi 2009 – 2010, iha 2011 – 2014 hanesan komisaria ba funsaun públika.
Isabel Ferreira, iha 2009-2015 hanesan asesora juridika ba sekretariu estadu seguransa-nian, iha fevereiru 2015-20 maiu 2015 hanesan asesora juridika ministeriu interior, konselleiru ministru edukasaun no advogada ba labarik iha setembru 2015-agostu 2017 no asesora ba sekretaria estadu ba protesaun sivil hosi agostu 2018 to’o agora.
Inan hosi Lola, Tamarisa no Quesadhip ne’e hatene lian tetun, portugés no indonézia no komprinde lian inglés.
Esperensia servisu seluk mak: xefe gabinete ba servisu eis prezidente repúblika, major jeneral Taur Matan Ruak hosi juñu 2017-juñu 2018, prezidente komisaun estraordinaria ba promosaun PNTL hosi 2012 – marsu 2014, membru asembleia konstituante setembru-outubru 2001.
Esperiénsia organizasaun no institusionál, Prezidente ba Komité Paralímpiku nasionál Timor-Leste, hosi 26 abril 2019-2021, Fundadora Centro Quesadhip Ruak, 2012-2021 no esperensia lubuk hahú hosi instituisaun Estadu no organizasaun sosiedade sivil. Nune’e mos partisipa eventu oin-oin hanesan partisipante no oradór prinsipál iha semináriu sira no konferénsia internasionál sira ne’ebé akontese iha rejiaun Ázia, Eropa, no Austrália.
Jornalista : Antónia Gusmão
Editór : Zezito Silva
