Edukasaun Covalima submete ona pedidu eskola menus kadeira-meza ba MEJD
COVALIMA, 19 juñu 2023 (TATOLI)–Diretór Servisu Munisipál Edukasaun Covalima, Francelino Freitas Carvalho, hateten Servisu Munisipál Edukasaun Covalima submete ona pedidu eskola-sira menus kadeira no meza ba Ministériu Edukasaun Juventude no Desportu (MEJD).
Notísia Relevante: Estudante EBF Lakonak Babo Covalima tuur iha rai tuir prosesu aprendizajen
“Servisu Edukasaun Covalima submete ona pedidu ba Ministériu Edukasaun Juventude no Desportu kona-ba ita-nia eskola sira menus kadeira meza iha munisípiu Covalima,” Francelino Freitas Carvalho hateten ba Agência Tatoli, iha Santa Rosa, segunda ne’e.
Problema eskola menus kadeira meza edukasaun halo esforsu no hodi submete pedidu iha kedas tempu diretór edukasaun sestante nia mandatu, maibé to’o ohin loron seidauk iha resposta hosi Ministériu Edukasaun Juventude no Desportu (MEJD).
Ho nune’e, kona-ba dadus eskola hira mak sei menus kadeira meza iha munisípiu Covalima nia parte seidauk iha dadus, eskola iha Covalima menus kadeira meza tanba foin pose iha loron 02 fulan-juñu tinan ne’e hodi asumi kargu diretór Servisu Munisipál edukasaun Covalima.
Antes ne’e, Estudante Eskola Bázika Filiál Lakonak Babo, Adriano do Carmo, sente triste tanba EBF Lakonak Babo, suku Debos, postu administrativu Suai, munisípiu Covalima tuur de’it iha rai hodi tuir prosesu aprendijazen.
Profesór EBF 1.2 Lakonak Babo, Fernando do Carmo reforsa, Eskola sei menus fasilidade nune’e halo estudante balun tuur de’it iha rai hodi tuir prosesu aprendizajen.
Tuir dadus hosi Servisu Edukasaun Covalima eskola ne’ebé estabelese iha munisípiu Covalima hamutuk 128 hosi númeru ne’e eskola pre-eskolár 26, Eskola Bázika Centrál (EBC) 24, EBF 70, Eskola Sekundáriu jerál Públiku tolu (3) no Eskola Sekundáriu Tékniku Vokasionál lima (5).
Jornalista : Celestina Teles
Editór : Cancio Ximenes
