DILI, 19 juñu 2023 (TATOLI)–Partidu Congresso Nacional para a Reconstrução de Timor-Leste (CNRT), liuhosi konferénsia nasionál, segunda ne’e, ofisialmente deklara halo koligasaun ho Partidu Demokrátiku (PD) hodi forma IX Governu.
Sekretáriu Jerál Partidu CNRT, Francisco Kalbuadi Lay, husu ba estrutura tomak ne’ebé mak marka prezensa iha konferénsia atu hit liman bainhira konkorda partidu koliga ho PD no bainhira la konkorda la persiza hit liman.
“Ho permisaun Prezidente Partidu Xanana Gusmão, ha’u hanesan Sekretáriu Jerál, husu ba konfrensista ne’ebé reprezenta partidu hanesan desizaun ne’ebé a’as liu tuir Lei Eleitorál, nune’e mós estatutu partidu, autoriza hodi husu ba konfrensista sira hotu, katak sé mak konkorda CNRT koliga ho PD hit liman no sé mak la konkorda labele hit liman,” Kalbuadi Lay dehan durante konferénsia iha salaun OKA, Aimutin.
Bainhira konfrensista sira hit liman hodi hatudu aktu apoia totalmente ba CNRT halo koligasaun, Prezidente partidu Xanana Gusmão deklara katak maioria konkorda.
Notísia relevante : PD preparadu hamutuk ho CNRT forma Governu
“Rezultadu ne’e hatudu katak konkorda pur unanimidade,” Xanana Gusmão deklara.
Biban ne’e, Xanana Gusmão apela ba kuadru sira hotu katak bainhira hetan fiar hodi asume kargu ruma tenke serbí Estadu no povu ho di’ak tanba povu fó fiar ba partidu la’ós ba ema ida de’it.
“Kuandu estabelese partidu ida, la’ós atu kuadru hotu hanoin katak manán karik tenke sai boot, maibé partidu hanesan organizasaun polítiku ida ne’ebé sidadaun ho hanoin hanesan ba hamutuk atu esforsu-an hodi hatudu ba povu katak ami sei buka lori rai ne’e ba oin no hadi’a povu-nia moris,” nia fó hanoin.
Nune’e, Xanana husu ba militante no kuadru partidu atu labele sente orgullu demais, tanba orgullu ne’e bele estraga ema ida, maibé tenke kontente tanba asegura ona páz no estabilidade.
Jornalista : Antónia Gusmão
Editora : Julia Chatarina
