DILI, 19 juñu 2023 (TATOLI) – Ministériu Edukasaun, Juventude no Desportu (MEJD) deside ona katak karteira eskolár hamutuk 300-resin ne’ebé rai hela iha armazén sei apoiu de’it ba pré-eskolár no ensinu báziku.
Diretór Nasionál Patrimóniu Lojístiku no Teknolojia, Pedro dos Reis, afirma MEJD rejista pré-eskolár no eskola bázika hamutuk 236 no husi númeru ne’e ministériu distribui ona karteira eskolár durante tinan ida nian laran.
“Ami deside ona sei la apoiu tan karteira eskolár ba ensinu sekundáriu jerál no tékniku vokasionál tanba karteira eskolár la to’o ona”, dehan Pedro dos Reis, iha Vila Verde.
Nia salienta katak ba eskola sira ne’ebé to’o agora seidauk hetan apoia karteira eskolár, Ministériu Edukasaun fó tempu atu hatama proposta no dirije ba diresaun hodi halo identifikasaun, bainhira loos ona maka sei hetan karteira refere.
Nia dehan Ministériu Edukasaun deside karteira eskolár ne’ebé sei rai hela iha armazén ne’e atu oferese de’it bá nivel ensinu báziku, tanba sira ne’e maka dala barak enfrenta liu dezafiu kompara ho ensinu sekundáriu no tekniku vokasionál sira.
Tanba ne’e, nia husu ba dirijente edukasaun munisipál no superintendente sira iha baze atu halo identifikasaun ba kondisaun eskola sira iha ida-idak ninia munisípiu relasiona ho falta mobiliáriu eskolár atu aprezenta mai ministériu hodi bele hetan apoiu.
“Ensinu báziku sira iha munisípiu sempre enfrenta problema mobiliáriu eskolár, maibé edukasaun nasionál labele halo buat ida, tanba laiha proposta ida maka sira haruka mai”, katak.
Ho karteira eskolár ne’ebé sei asegura hela iha armazén ne’e, MEJD husu ba munisipiu sira ne’ebé karik halo ona identifikasaun ba eskola bázika ne’ebé seidauk hetan apoiu karteira eskolár bele submete ona proposta atubele haruka ekipa ba observa hodi hetan ajuda.
Notísia relevante: MEJD distribui ona karteira eskolár 18.817 ba eskola 292
Jornalista: Tomé Amado
Editora: Maria Auxiliadora
