MNEK no MKAE sei realiza workshop kona-ba akordu komérsiu ASEAN
DILI, 19 juñu 2023 (TATOLI)—Ministériu Negósiu Estranjeiru no Kooperasaun (MNEK) hamutuk ho Gabinete Ministériu Koordenadór ba Asuntu Ekonómiku (MKAE), iha tersa (20/06) sei realiza workshop kona-ba Asosiasaun Nasaun Sudeste Aziátiku (ASEAN, sigla inglés) nia akordu komérsiu esensiál tolu no ninia implikasaun ba Timor-Leste.
Tuir nota ne’ebé Agência Tatoli asesu segunda ne’e, workshop sei hala’o durante loron-tolu, ne’ebé hetan apoiu hosi Austrália nia programa Governansia Parseria ba Prospriedade Inkluzivu (PROSIVU).
ASEAN nia akordu komérsiu esensiál tolu mak hanesan komérsiu ba sasán (ATIGA, sigla inglés), komérsiu ba atendimentu servisu (ATISA, sigla inglés) no investimentu kompreensivu (ACIA, sigla inglés).
Notísia relevante : Timor-Leste adere ba ASEAN vantajen iha ekonomia rejionál
Objetivu hosi atividade ne’e mak hakarak atu hasa’e Timor-Leste nia koñesimentu kle’an kona-ba akordu ATIGA, ATISA no ACIA.
Aleinde ne’e, fó koñese mós akordu tolu ne’e nia ambitu, estrutura, dever prinsipál no implikasaun ba Timor-Leste nia ekonomia, komérsiu no senáriu investimentu, nune’e fasilita Timor-Leste nia atinjimentu sai membru permanente ASEAN.
Timor-Leste daudaun ne’e tama ona ASEAN maibé anesan observadór iha simeira ba dala-40 no 41 iha novembru 2022.
Iha Simeira ASEAN ba dala-42 iha loron 10 maiu 2023, rotériu ba Timor-Leste nia adezaun ba asosiasaun no hetan ona konkordá dia hosi ASEAN, maka fornese kritériu konkista ba Timor-Leste hodi atinje sai membru permanente ASEAN, enkuantu ATIGA ATISA no ACIA hanesan parte ida hosi rekerimentu ne’ebé fó sai iha rotériu ne’e no nu’udar savi hosi akordu ASEAN, ne’ebé mak bainhira implementa ho susesu sei fasilita Timor-Leste nia partisipasaun boot iha komérsiu internasionál no kadeia valór globál.
Entidade ne’ebé envolve iha workshop ne’e mak hanesan MNEK nia Diresaun Jerál ba Asuntu ASEAN no MEKAE nia líder ba enkontru ekonómiku ofisiál seniór indikativu Timor-Leste no apoiu hosi Austrália nia programa PROSIVU.
Workshop ne’e nia alvu maka ofisiál Governu no parte interesante sira hodi halo diskusaun, troka koñesimentu no hasa’e kapasidade.
Workshop ne’e sei inklui mós aprezentasaun hosi péritu legál hosi Lexbridge Lawyers Pty, PROSIVU nia péritu komérsiu, Organizsaun Mundiál Komérsiu (OMK), ASEAN inklui reprezentante hosi Department Of Foreign Affairs and Trade (DFAT).
Jornalista : Arminda Fonseca
Editora : Julia Chatarina
