DILI, 19 juñu 2023 (TATOLI)–Líder nasionál no atuál Prezidente Partidu Congresso Nacional para a Reconstrução de Timor-Leste (CNRT), Kayrala Xanana Gusmão, hato’o sentidu kondolénsia ba falesimentu Antigu Vise-Ministru Saúde, Luís Lobato no Isabel Ferreira, nu’udar espoza Primeiru-Ministru, Taur Matan Ruak, ne’ebé hakotu iis iha loron hanesan.
Xanana Gusmão hato’o aktu tristeza ne’e bainhira prezide minutu silénsiu iha ámbitu konferénsia nasionál Partidu CNRT, ne’ebé hala’o iha salaun OKA, Aimutin, segunda ne’e.
Notísia relevante : Luis Lobato fila ona ba mundu seluk
“Aproveita biban ne’e, hakarak hato’o sentidu kondolénsia ba Luís Lobato ne’ebé fila hikas ba Maromak nia kadunan Santu, nune’e mós lori partidu nia naran, ita hato’o mós kondolénsia ba família Dona Isabel Ferreira, ba nia kaben Taur Matan Ruak no ba nia oan sira ne’ebé agora ba oin sira la haree no la sente sira-nia inan nia prezensa iha uma,” Xanana Gusmão dehan.
Notísia relevante : Kankru Intestinu habadak viajen Isabel Ferreira iha mundu
Luís Lobato hakotu iis iha domingu madrugada tanba sofre moras fuan, enkuantu Isabel Ferreira hakotu viajen moris iha domingu kalan tuku 20:48 otl tanba sofre moras kankru intestinu.
Jornalista : Antónia Gusmão
Editora : Julia Chatarina
