DILI, 20 juñu 2023 (TATOLI)—Prezidente Komisaun A trata asuntu Justisa no Konstituisional, Deputadu Joaquim dos Santos ‘Boroluli’, hateten alterasaun lei pensaun vitalísia kaduka iha lejislatura dalimak bele kontinua iha lejislatura daneen.
Notísia Relevante: PN lejislatura dalimak la konsege altera lei pensaun vitalísia
“Rejime renumeratóriu ba órgaun titulár sobernia (alterasaun lei pensaun vitalísia) kaduka tiha ona, públiku akompaña tiha ona tanba momentu ne’eba maiória parlamentár la konkorda atu aprova lei ne’e, tenke haruka ba reformulasaun ne’ebé haruka ba reformulasaun iha dezentendimentu entre Deputadu sira ho membru Governu, entaun Governu la konsege reformula no la konsege haruka mai Parlamentu. Entaun, ne’e konsidera kaduka, iha oin mai inisiativa bele haruka fila-fali. Dezde hamoris lei ne’e kondisiona situasaun hotu-hotu tuir mandate konstituisaun tanba ita halo lei labele sai hosi ida-ne’e,” Prezidente Komisaun A ne’e hateten liuhusi programa Entrevista Eskluziva iha estúsdiu Agência Tatoli, Faról, tersa ne’e.
Tambá haree kestaun tempu lejislatura dalimak nia mandatu hela loron hira tan termina ona, konserteza proposta lei ne’e kaduka, nune’e iha lejislatura foun mai bele kontinua bainhira iha inisiativa.
Aleinde ne’e, Prezidente komisaun A ne’e hateten iha komisaun A iha inisiativa proposta ka projetu-lei seluk ne’ebé kaduka mós iha meza Prezidente Parlamentu Nasionál mak hanesan estatutu ba Providória Direitu Umanu no Justisa (PDHJ), orden advogadu, orden médiku, rádiu difuzaun, ida-ne’e loloos aprovasaun iha finál globál maibé kaduka.
“Tanba ne’e, Deputadu sira iha lejislatura foun mai bele kontinua hamoris fila-fali bainhira iha inisiativa,” nia hateten.
Notísia Relevante: Bankada CNRT sei fó prioridade altera pensaun vitalísia iha lejislatura foun
Jornalista : Nelson de Sousa
Editór : Cancio Ximenes
