DILI, 09 juñu 2023 (TATOLI)—Xefe bankada CNRT iha Parlamentu Nasionál (PN), Deputadu Duarte Nunes, kompromete sei fó prioridade ba diskusaun alterasaun lei pensaun vitalísia iha lejislatura foun mai.
Notísia Relevante: PN lejislatura dalimak la konsege altera lei pensaun vitalísia
“Ha’u hanoin bele akontese tanba ha’u-nia votu ida, maibé intermu polítika ka partidu, ha’u bele hateten katak ami sei halo esforsu hakotu tiha pensaun vitalísia. Ami sei diskute para ida-ne’e bele akontese,” Xefe Bankada CNRT, Deputadu Duarte Nunes, hateten ba jornalista sira iha uma fukum Parlamentu Nasionál, sesta ne’e.
Tuir nia, aseita ho alterasaun ne’e nafatin kontinua diskute ba proposta-lei ne’ebé daudaun ne’e iha PN atu hodi integra ba iha seguransa sosiál ne’ebé kobre ona buat hotu-hotu.
“Ha’u uluk iha hanoin atu seguransa sosiál ne’e mai kobre ona buat hotu-hotu. Ita espera, hanoin ne’e sei bele la’o ba oin nafatin, tanba alterativu seluk hotu-hotu iha seguransa sosiál inklui membru Governu, Deputadu sira momentu ne’e iha klaran ona ne’ebé interrese mós iha. Agora hahú kedas. Ita espera katak bele avansa ho lei ida-ne’e, seguransa sosiál,” nia hateten.
Antes ne’e, Prezidente Parlamentu Nasionál, Aniceto Longuinhos Guterres Lopes, hateten katak alterasaun lei pensaun vitalísia iha lejislatura dalima haree ba tempu limitadu ona, nune’e bele kontinua iha lejislatura daneen mai karik iha inisiativa.
Notísia Relevante: Deputadu maiória lakohi altera lei pensaun vitalísia
Jornalista : Nelson de Sousa
Editór : Cancio Ximenes
