Top

Deputadu Joaquim destaka dezáfiu tolu nu’udar lejisladór iha PN

Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 20 juñu 2023 (TATOLI)—Prezidente Komisaun A trata asuntu Justisa no Konstituisional, Deputadu Joaquim dos Santos ‘Boroluli’, destaka dezáfiu tolu nu’udar lejisladór atu prodús lei sira iha Parlamentu Nasionál (PN).

Notísia Relevante: Komisaun A prodús lejislasaun konsentra reforma judisiáriu-administrativu durante lejislatura dalimak

“Dezáfiu boot liu iha komisaun hotu-hotu iha Parlamentu nian mak apoiu tékniku profisionál sira, ita iha asesór maibé dala ruma asesór ladun barak, Dala ruma komisaun rua tolu serbisu tempu, hanesan asesór fahe la to’o entaun asesór balun halo serbisu ajuda komisaun rua bele to’o tolu mais barak liu ida. Ne’ebé bele re-urjente sira, ita iha difikuldade. Iha ne’e atu kumpre urjénsia tempu tanba Deputadu sira la’ós serbisu mesak maibé serbisu ho apoiu tékniku legál sira ho asesór jurídiku sira. Ida-ne’e primeira coisa ha’u rejistu mak ida-ne’e prezúdika ita-nia prosesu serbisu,” Prezidente komisaun A ne’e hateten liuhosi programa Entrevista Eskluziva iha estúdiu Agência Tatoli, I.P, Faról, tersa ne’e.

Nia hateten, dezáfiu daruak mak infraestrutura, nune’e PN ba oin labele serbisu ho ida agora ne’e, tanba edifísiu daudaun ne’e Governu nian uza de’it ne’ebé durante tinan 20 independénsia   seidauk rezolve edifísiu ida ba PN.

“PN tenke iha edifísiu rasik tanba durante tinan 20 ita serbisu iha cove house de’it, tnba ne’e dala ruma ita atu konvoka reuniaun iha PN entidade bara-barak mai fó opiniaun ne’e defísil. Entaun, ita tenke buka fatin iha li’ur, difikuldade mak ne’e,” nia dehan.

Deputadu Joaquim hateten dezáfiu ikus mak Deputadu sira menus koñesimentu legal, entaun prezudika deputadu sira iha debate.

“Difikuldade ida seluk mak ami Deputadu balun menus koñesimentu iha asuntu legal, tanba barak liu halo polítiku de’it entaun prezúdika ita-nia debate. Ita-nia hanoin dook tiha ona, maibé sira como ne’e, entaun ita tenke ba oin mai kotuk,” nia dehan.

Prezidente komisaun A ne’e hateten, solusaun mak PN tenke sai hosi cove house ne’ebé komisaun sira utiliza hela hala’o serbisu tenke iha edifísiu rasik, ne’e bele rezolve buat hotu hodi kondisiona infraestrutura tuir nesesidade kna’ar PN nian.

“Daruak mak tenke prepara rekursu umanu sufisiente liu-liu ema-ne’ebé profisionál atu fó apoiu ba parlamentár. No, datoluk, partidu polítiku sira tau ema ba kandidata ba Deputadu karik tenke ho prozesaun ema ida ho profisionál no méritu, para Parlamentu ne’e iha kualidade debate para prodús inisiativa ne’ebé iha kualidade. Se ida-ne’e mak la halo, ita sei hasoru problema iha future,” nia hateten.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!