Edukasaun Covalima fó formasaun ba grupu EJP oinsá elebora relatóriu
COVALIMA, 20 juñu 2023 (TATOLI)–Coordenadór Programa Merenda Eskolár, Francisco Cardoso, hateten Servisu Edukasaun Covalima fó formasaun ba grupu Ekipa Jestaun Programa (EJP) kona-ba oinsá elabora relatóriu ba implementasaun programa merenda eskolár kada trimestrál.
Notísia Relevante: Implementasaun programa merenda eskolár iha Covalima sei hahú abríl
“Ohin, ami konvida Grupu Ekipa Jestaun Programa (EJP) atu halo esplikasaun kona-ba oinsá atu halo relatóriu trimesterál ho di’ak, tanba programa merenda eskolár la’o durante fulan tolu ona no ezije grupu sira atu elobora relatóriu,” Francisco Cardoso hateten ba Agência Tatoli, iha salaun Edukasaun Covalima, Santa Rosa, tersa ne’e.
Edukasaun Covalima fó esplikasaun kona-ba oinsá atu elobora relatóriu, tanba bazeia ba matadalan kada trimesterál sira tenke entrega relatóriu.
“Grupu Jestaun Programa seidauk entrega relatóriu foin ami fó orientasaun, fó briefing ba sira, bazeia ba matadalan katak GJP entrega relatóriu kada trimesterál no fó han labarik tuir loron efetivu,” nia dehan.
Nia hateten, Servisu Edukasaun Covalima implementa programa merenda eskolár la’ós foun, maibé iha diferénsa mak tanba mudansa osan kada estudante, tanba antes ne’e ho de’it 0,25, maibé agora kada estudante han 0,35 kada loron.
Tuir observasaun hosi edukasaun, implementa programa merenda eskolár iha Covalima la’o di’ak tanba Grupu EJP tenke fó hahan b estudante sira hanesan hahan nutritivu, fó protesaun no haburas no grupu sira implementa tuir matadalan.
“Ami konsidera sira kumpre matadalan tanba kria grupu WhatsApp hodi relata. Bainhira sira la tuir ami fó kedas orientasaun hodi halo koresaun, nune’e 75% grupu sira hala’o programa ho di’ak maske hasoru difikuldade hanesan menus produtu lokál iha postu sira,” nia hateten.
Antes ne’e, implementasaun programa merenda eskolár ba estudante pre-eskolár públiku no ensinu báziku públiku de’it, maibé ba tinan ne’e, implementa hotu iha eskola privadu no públiku hamutuk 135 ho totál estudante 18,402 no nia orsamentu hamutuk $1,143,937.20.
Jornalista : Celestina Teles
Editór : Cancio Ximenes
