VIQUEQUE, 20 juñu 2023 (TATOLI)–Diresaun Jestaun Merkadu no Turizmu munisípiu Viqueque hakarak intensifika kobransa taxa publisidade liuhosi halo halo sensibilizasaun ba empreza sira hodi selu taxa publisidade ba Estadu.
“Tinan ida-ne’e ami kontinua esforsu halo sensibilizasaun kona-ba prosedimentu lisensa publisidade tuir dekretu-lei númeru 51/2016, ba lisensiamentu mensajen publisitáriu sira hosi empreza internasionál no empreza lokál sira iha Viqueque. Nune’e ami konsege rekolla taxa ba kofre Estadu hamutuk $1.000 iha tinan kotuk,” Diretór Jestaun Merkadu no Turizmu munisípiu Viqueque, Estevão de Carvalho, informa ba Agência Tatoli, iha ninia knaar fatin, Administrasaun Viqueque, tersa ne’e.
Notísia relevante : MAE kontribui reseita taxa publisidade $156.578.32 ba kofre Estadu
Nune’e, ekipa hosi Jestaun Merkadu no Turizmu sei buka empreza sira hanesan Telkomcel, Telemor, Timor Telecom no BNU, ne’ebé halo atividade bele kumpre sira-nia dever, nune’e tenke hatama taxa ba Estadu.
“Iha empreza balun maka seidauk submente lisensa ba ami, ne’ebé ami kontinua buka tuir no halo sensibilizaun kona-na dekretu-lei ba publisidade nune’e sira bele kompreende hodi selu taxa ba Estadu. Ami-nia obrigasaun ida maka halo sensibilizasaun iha empreza sira-nia fatin hodi sira bele kumpre tanba ne’e bazeia ba dekretu-lei, nune’e sidadaun sira tenke iha obrigasaun hodi selu,” nia tenik.
Munisípiu Viqueque foin aplika taxa publisitáriu iha tinan kotuk, nune’e presiza alarga informasaun ba empreza sira.
Ekipa Jestaun Merkadu no Turizmu rekolla taxa publisitáriu hamutuk $158,78, hahú hosi janeiru to’o juñu 2023 no sei iha prosesu atu selu iha banku hamutuk $520,13.
Funsionáriu ne’ebé serbisu iha diresaun ne’e hamutuk na’in-tolu, kompostu hosi diretór ida no funsionáriu na’in-rua.
Jornalista : Vitorino Lopes da Costa
Editora : Julia Chatarina
