VIQUEQUE, 20 juñu 2023 (TATOLI)–Progresu projetu konstrusaun armazén ba Servisu Saúde munisípiu Viqueque hodi rai estoke ai-moruk iha munisípiu Viqueque, daudaun ne’e atinje ona 20 %.
“Bazeia ba planu munisípiu Viqueque ne’ebé prevee ba orsamentu normál ba Planeamentu Integradu no Dezenvolvimentu Munisipál (PDIM) tinan 2023, iha projetu haat mak sei implementa iha tinan ne’e. Hosi projetu haat ne’e, projetu rua maka daudaun ne’e empreza responsável halo hela serbisu hanesan konstrusaun armazén ba Servisu Saúde munisípiu Viqueque, agora progresu serbisu atinje 20% no konstrusaun edifísiu postu Ossu inklui rezidénsia Administradór postu Ossu atinje 0,2%,” Diretór Servisu PDIM Viqueque, Domigos de Carvalho Monteiro, informa ba Agência Tatoli iha ninia knaar fatin, Administrasaun Viqueque, tersa ne’e.
Projetu rua hanesan konstrusaun Ensinu Báziku Filiál Cailake Baha Bu’u ne’ebé lokaliza iha suku Ahic, postu Lacluta no rebilitasaun rezidénsia Administradór munisípiu Viqueque halo hela re-konkursu.
“Daudaun sei iha prosesu maibé iha ona empreza manán-na’in ba projetu rua ne’e, nune’e ami hein tempu re-konkursu ramata mak sei halo xamada ba empreza hodi mai asina karta aseitasaun. Depois asina kontratu, ami sei konvida empreza sira hodi lori ba fatin implementasaun projetu,” nia akresenta.
Notísia relevante : CCM Viqueque halo apresiasaun ba proposta tolu
Aleinde ne’e, Servisu PDIM Viqueque kontinua haree tarefa serbisu sira no halo motorizasaun ba projetu ne’ebé implementa iha Viqueque tuir oráriu hosi empreza implementadór sira no submete karta ba PDIM Viqueque hodi hetan instrusaun hosi tékniku PDIM rasik inklui Unidade Traballu Espesífiku (UTE) tanba empreza labele implementa molok hetan instrusaun.
“Ami sei halo kontrulu hodi bele garante kualidade,” nia hato’o.
Konstrusaun foun armazén rai ai-moruk, iha suku Caraubalo, postu Viqueque vila hahú implementa iha loron 19 abríl 2023 no tuir planu sei finaliza iha 31 outubru 2023, ho alokasaun orsamentu hamutuk $144.286, enkuantu konstrusaun edifísiu postu administrativu Ossu inklui morru haleu iha suku Ossu de Cima ho orsamentu $247.213. Projetu rua seluk iha hela prosesu nia-laran.
Jornalista : Vitorino Lopes da Costa
Editora : Julia Chatarina
