VIQUEQUE, 12 juñu 2023 (TATOLI)—Konsellu Konsultivu Munisípiu Viqueque (CCM, sigla portugés), segunda ne’e, halo apresiasaun ba proposta tolu kona-ba programa prioridade hodi hadi’a dezenvolvimentu tuir planu munisipál ordenamentu territóriu (PMOT) ba sustentabilidade ekonomia iha munisípiu nian, liuhosi votasaun hosi membru hamutuk 40.
Proposta tolu ne’e mak hanesan espansaun Edifísiu munisípiu Viqueque muda bá área Atekauan no Ratahau ho votu afavór 38, abstensaun 1 no kontra 0, edifísiu Kámara munisípiu Viqueque ho votu afavór 39, abstensaun 0 no kontra 0 no ba estabelesementu ospitál munisípiu Viqueque rua hanesan Tau Luhar okupa rai ektare 3 no Buanurak okupa rai ektare 9 ho votu afavór 37 abtensaun 1 no kontra 1. Aleinde ne’e iha proposta sira seluk tuir nesesidade munisípiu Viqueque nian maibé seidauk halo apresiasaun.
Prezidente CCM no atuál Administradór munisípiu Viqueque, Januário Soares ‘Bolly’ konvoka reuniaun CCM hodi halo koordenasaun no apresiasaun ba proposta hodi submete ba nasionál nu’udar planu asaun tinan 2024.
“Ho objetivu ida-ne’e konvida membru CCM hosi suku tolu hamutuk na’in-36, reprezenta partidu polítiku, juventude no feto hodi ita halo apresiasaun projetu sira-ne’ebé importante atu bele aprezenta ba Governu sentrál bele tau konsiderasaun. Ita deside hamutuk mak foin bele lori ba nasionál,” Januário Soares hateten liuhosi nia diskursu, iha salaun administrasaun munisipál.
Notísia relevante : Munisípiu Viqueque kontinua tau prioridade ba fatin lixu
Bazeia ba dekretu-lei númeru 54/2020, 28 outubru no segundu alterasaun ba dekretu-lei númeru 03/2016, 16 marsu, artigu 42 sita katak CCM mak orgaun konsultivu hosi Autoridade munisipál ka Administrasaun munisipál nian, ho nia kompozisaun tuir artigu 45 mak hanesan Administradór munisípiu, Sekretáriu munisípiu, Xefe suku, Reprezentante Antigu Kombatente, setór privadu, grupu intelektuál, joventude, konfisaun relijioza, muller, no partidu polítiku.
Atividade apresiasaun proposta partisipa hodi membru CCM munisipál hanesan reprezentante Veteranu, Diretór Servisu Munisipál, Xefe Departamentu, Liña Ministeriais, Administradór postu lima, Xefe suku 36, delegasaun territoriál munisipál, Pontu Fokál sira inklui funsionáriu SMPID-PDIM.
Jornalista : Vitorino Lopes da Costa
Editora : Julia Chatarina
