Aliserse konstrusaun postu saúde Tilomar nakfera tanba dezastre naturál
COVALIMA, 21 juñu 2023 (TATOLI)–Diretora Servisu saúde Munisípiu Covalima, Maria de Fátima Moniz, klarifika konstrusaun postu saúde Raihun, suku Beiseuk, postu administrativu Tilomar, munisípiu Covalima nia aliserse hahú nakfera tanba impaktu hosi dezastre naturál.
Notísia Relevante: Konstrusaun postu saúde Tilomar seidauk inaugura maibé nia aliserse hahú nakfera
“Ita haree iha fulan-juñu kalamidade rai nakdoko tuir Dirasaun Nasionál Meterolojia fó sai iha magnitude 7.88 fó impaktu ba rai nakdoko, rai halai no rai nakfera, iha suku Beisauk hodi afeta ba postu saúde Raihun, suku Beiseuk, bazeia ba ami-nia tékniku haree no sukat iha rai dada aan 40 sentímu hosi aliserse ne’ebé iha hodi fó impaktu hosi dezastre naturál,” Maria de Fátima Moniz ba jornalista sira iha salaun AMC, Sukaer Laran, kuarta ne’e.
Hafoin tékniku hala’o observasaun ba konstrusaun postu saúde Raihun, nia parte mós submete kedas relatóriu ba Ministériu Saúde (MS).
“Bazeia ba informasaun, ami0nia tékniku sira hala’o fiskalizasaun iha terrenu entaun ami relata ona relatóriu ba Ministériu Saúde (MS). Tanba, kronólojia konstrui postu saúde Raihun la’ós MS mak haree direta, maibé servisu hamutuk autoridade lokál hodi identifika fatin ne’ebé mak antes iha tempu okupasaun Indonézia konstrui ona postu saúde Raihun,” nia dehan.
Kompañia ne’ebé konstrui postu saúde ida momentu ne’e fatin seguru, nune’e kompañia besik finaliza ona konstrusaun akontese dezastre naturál ho tipu rai halai, nune’e postu saúde Raihun aliserse hahú nakfera.
“Iha momentu ne’e, ita haree fatin ne’e seguru hodi konstrui postu saúde hafoin kompañia hala’o konstrusaun besik finaliza ona tanba atinje ona 99,78%, falta de’it 0,22% mak seidauk maibé ho akontesimentu rai halai ne’e afeta ba konstrusaun ne’e ninia aliserse nakfera,” nia hateten.
Antes ne’e, komunidade preokupa ho konstrusaun postu saúde Raihun iha suku Beiseuk, postu Tilomar, munisípiu Covalima ne’ebé konstrui hosi kompañia Carame Unipesoál, Lda, hahú iha 18 fulan-agostu 2021 seidauk finaliza konstrusaun mak aliserse nakfera fali.
Entertantu, postu saúde Raihun, suku Beiseuk, postu Administrativu Tilomar, munisípiu Covalima, konstrui hosi kompañia Carame Unipesoál, Lda, ne’ebé hahú konstrui iha 18 agostu 2021 no finaliza iha 17 fevereiru 2022, maibé to’o ohin loron seidauk hala’o inaugurasaun.
Bazeia ba kontratu kompañia Carame Unipesoál, Lda, hala’o konstrusaun postu saúde ho durasaun tempu fulan neen ne’ebé ho totál orsamentu $295,785.42.
Jornalista : Celestina Teles
Editór : Cancio Ximenes
