Konstrusaun moru sentru saúde Suai iha faze loke konkursu públiku
COVALIMA, 21 juñu 2023 (TATOLI)–Diretora Servisu Saúde Munisípiu Covalima, Maria de Fátima Moniz hateten, prosesu atu konstrui moru sentru saúde suai, munisípiu Covalima monu tanba impaktu dezastre naturál hanesan inundasaun ne’ebé akontese iha juñu 2022 ne’e sei iha faze loke konkursu públiku.
Notísia Relevante: Governu sei konstrui moru sentru saúde Suai iha tempu badak
“Prosesu atu konstrui moru iha sentru saúde Suai, postu administrativu Suai, munisípiu Covalima, ami hato’o proposta ba ho nia solusaun kedas foin lalais ami realiza enkontru konsellu konsultivu iha nasionál, ha’u levanta ida-ne’e,” Maria de Fátima Moniz hateten ba Agência tatoli, iha salaun AMC, Sukaer Laran, kuarta ne’e.
Maske hato’o ona proposta liuhosi reuniaun kosellu konsultivu iha nasionál maibé hosi dirasaun aprovizionamentu esplika katak sei iha prosesu no hein tan fulan ida ka rua atu hahú konstrui moru sentru saúde Suai ne’ebé monu.
Antes ne’e, iha 01 jullu 2022, Ministra Saúde Odete Maria Freitas Belo hamutuk ho nia ekipa halo ona observasaun ba kondisaun sentru saúde Covalima ne’ebé afeta hosi inundasaun ne’ebé halo moru sentru saúde Suai monu.
Hafoin halo observasaun, Ministra Saúde mós promete atu hadi’a moru ne’ebé monu maibé komunidade mós defisil atu entrega rai atu bele konstrui bee-dalan
Xefe Sentru Saúde, Mateus Oliveira Mendonça, hateten inundasaun akontese afeta ba sentru saúde hodi estraga fasilidade saúde no moru monu.
Jornalista : Celestina Teles
Editór : Cancio Ximenes
