Governu sei konstrui moru sentru saúde Suai iha tempu badak
COVALIMA, 31 janeiru 2023 (TATOLI)–Diretór Servisu Saúde Covalima, Maria de Fátima Moniz, hateten Governu sei halo konstrusaun moru sentru saúde Suai iha tempu badak.
Notísia Relevante: Ministra Saúde observa Sentru Saúde Covalima afetadu ba inundasaun
“Kompaña ne’ebé ita haruka ba, bazea ita identifika kompaña ne’ebé iha kapital no mós iha ekipamentu. Ita haree momentu ne’e, ami haruka proposta Kompaña Unidade Unipesoál, Lda. Ita hein solusaun sei mai bele konstrui moru iha sentru saúde Suai ne’ebé hetan estragu hosi inundasaun iha tempu badak. Tuir informasaun preparadu ona no ita hein de’it,” Diretora Servisu Saúde Munisípiu Covalima, Maria de Fátima Moniz, hateten ba Agência Tatoli, iha nia kna’ar fatin, Camnasa, tersa ne’e.
Moru sentru saúde Suai monu tanba impaktu hosi dezastre naturál no inundasaun ne’ebé akontese iha fulan-juñu tinan 2022, entaun hosi servisu saúde Covalima haruka kedas proposta hein de’it ona desizaun.
“Hafoin moru monu, tanba impaktu hosi inundasaun entaun ita halo proposta no ita haruka kedas ba ministériu tutela. Agora hein desizaun hosi nasionál, foin lalais iha konfirmasaun katak sira sei nafatin halo nune’e prosesu tuir ita-nia proposta,” nia hateten.
Bazea ba proposta ne’e, dezeñu Planta no Kadernu Enkargu (BoQ) no orsamentu preparadu ona iha Ministériu Saúde no hein implementa. Tanba, razaun seidauk halo kampaña imunizasaun no servisu ne’ebé seidauk bele realiza maibé iha ona progresu di’ak tempu badak sei konstrui.
Hafoin moru monu, iha loron 01 fulan-jullu tinan 2022, Ministra saúde ho nia ekipa tun direta kedas hodi halo observasaun ne’ebé afetadu inundasaun.
Inundasaun ne’e, akontese iha loron 30 fulan-juñu tinan 2022 udan boot halo mota sa’e to’o afeta mós ba sentru saúde Covalima.
Ho nune’e diretór saúde mós haruka kedas proposta ba Ministériu Saúde atu halo konstrusaun moru ne’ebé monu tanba impaktu hosi inundasaun, tanba ne’e agora iha ona sinál pozitivu iha tempu badak sei halo konstrusaun.
Notísia Relevante: Servisu Saúde Covalima haruka ona pedidu rekonstrui moru ba MS
Jonalista : Celestina Teles
Editór : Cancio Ximenes
