VIQUEQUE, 21 juñu 2023 (TATOLI)–Xefe Departamentu Moras Hadaet iha Ministériu Saúde (MS), Maria do Rosário Fátima, informa, daudaun Timor-Leste la rejista ona moras malária, nune’e hahú tama ba faze iha eleminasaun.
“Ekipa Ministériu Saúde, Fundu Globál hamutuk ho Servisu Saúde munisípiu 14 inklui Rejiaun Administrativa Espesiál Oé-cusse Ambeno (RAEOA) konsentra iha munisípiu Viqueque hodi halo avaliasaun ba implementasaun programa malária nian. Daudaun ne’e ita haree progresu hahú tama iha eleminasaun, ita mós ba prosesu sertifikasaun mundiál moras malária nian, katak Timor-Leste livre hosi malaria,” Maria do Rosário, hateten, hafoin partisipa enkontru ho Servisu Saúde munisipál sira, iha salaun postu administrativu Viqueque villa, kuarta ne’e.
Nia dehan, MS konvoka enkontru hamutuk Servisu Saúde sira atu haree munisípiu ninia preparasaun hahú hosi postu saúde no sentru saúde sira.
“Iha Timor laran kuaze ita ladún rejista ona kazu málaria, maibé rejista iha tinan 2020 ne’ebé relasaun ho COVID-19 maka rejista hanesan Covalima rejista kazu malária ida no Dili rejista ida. Bazeia ba investigasaun ne’ebé ami halo, iha ema na’in-rua ne’e bá vizita família sira iha Kupang, Indonézia maka hetan moras malária. Purtantu, kazu malária iha ita-nia rai-laran to’o agora la rejista ona,” nia relata.
Notísia relevante : MS sei deklara elemina moras Malaria iha TL
Maski tama ona ba eleminasaun maibé MS sei komunika ba munisípiu sira atu halo nafatin sosializasaun ba moras malária nian, nune’e karik mosu tan moras ne’e tenke halo intervensaun sedu ba pasiente.
“Ita-nia estratejia ida maka bainhira ita-nia ema ruma mai halo viajen ba ema-nia nasaun, fila mai ita tau ekipamentu iha pontu entrada hodi halo diagnóstiku, karik detekta malária ita halo kedas tratamentu, fó muskiteiru hodi proteje-an. Aleinde ne’e, ami mós hasai ran iha área ne’e atu la bele iha transmisaun, ida-ne’e hanesan esforsu ida,” nia tenik.
Aleinde ne’e, MS daudaun ne’e halo preparasaun atu taka panfletu no banner iha pontu entrada sira iha Timor-Leste atu fó sai mensajen ida katak Timor-Leste livre hosi malária.
“Atu nune’e bainhira turista sira tama mai vizita Timor-Leste, sira labele pániku ba moras malária tanba ita mós iha ai-moruk no ekipamentu sufisente iha fasilidade saúde hotu hodi fó atendimentu,” Xefe Departamentu Moras Hadaet hato’o.
Iha fatin hanesan, Diretór Servisu Saúde Viqueque, Pedro da Silva Pereira, hateten, Servisu Saúde munisípiu Viqueqeu sei kontinua halo atendimentu ba komunidade, liu-liu ba hirak ne’ebé hetan simtoma bainhira ba fasilidade saúde halo detekta hodi konfirma katak Viqueque livre hosi malária.
“Ha’u hanoin ida-ne’e maka esforsu munisípiu nian, dezafiu ne’ebé maka ami enfrenta maka ekipamentu, maibé ida-ne’e la sai obstáklu boot ba ami, tanba ne’e daudaun ita la resjita kazu malária iha munisípiu Viqueque. Ba oin ami kontinua esforsu hodi tau atensaun ba moras malária nian,” Maria do Rosário tenik.
Enkontru avaliasaun ne’e partisipa hosi reprezentante Servisu Saúde munisipál sira, Administradór Fundu Globál inklui ekipa hosi MS.
Jornalista : Vitorino Lopes da Costa
Editora : Julia Chatarina
