Prezensa sidadaun pakistaun iha Timor-Leste atu halo misaun relijiozu
DILI, 21 juñu 2023 (TATOLI)—Vise-Prezidente Konsellu Nasionál Islámiku Timor-Leste, Abdullah Inácio António Soares, esplika, prezensa sidadaun pakistaun iha Timor-Leste atu haklaken misaun relijiozu ba maluk musulmanu.
Abdullah Inácio hato’o kestaun ne’e relasiona ho grupu islámiku ne’ebé foin lalais to’o iha Timor-Leste no konsege virál iha rede sosiál halo públiku deskonfia terorista.
“Sira-nia prezensa ne’e tanba hetan konvinte hosi Fundasaun Sentru Komunidade Musulmanu Timor-Leste (CENCITIL, sigla portugés) atu haklaken doutrina islámiku ba komunidade musulmanu iha Timor-Leste. Daudaun ne’e sira na’in-ualu iha Dili, iha tempu badak sei halo misaun hanesan hanorin doutrina islámiku musulmanu sira iha munisípiu Bobonaro, Liquiçá, Manufahi, Baucau no Lautém, durante fulan-ida,” Vise-Prezidente Konsellu Nasionál Islámiku Timor-Leste, hateten ba Agência Tatoli, via telefónika, kuarta ne’e.
Notísia relevante: Atividade pilár lima importante ba komunidade musulmanu durante fulan Ramadhan
Nia esplika, delegasaun sira ne’ebé atu hanorin dutrina ne’e hanaran grupu Zamah Tablid, ne’ebé la’ós kompostu de’it hosi ema Pakistaun maibé mós hosi Indonézia, Malázia no Oman.
“Dutrina prinsipál ne’ebé sira sei hanorin maka kona-ba reza ativu ba Maromak ho regra halo orasaun loron-ida tenke reza dala-lima maibé ida-ne’e ba ami sarani musulmanu de’it,” nia akresenta.
Vise-Prezidente Konsellu Nasionál Islámiku dehan, durante ne’e maluk Pakistaun sira-nia prezensa iha Timor-Leste la la’o mesak, maibé hetan akompañamentu hosi maluk musulmanu sira iha Timor, tanba sira la’ós foin mak mai maibé antes mosu situasaun COVID-19 mós sira mai uluk ona.
“Antes sira mai, karta hosi CENCITIL tama ona ba Estadu, liu-liu parte relevante sira hanesan Ministériu Interiór hetan koiñesimentu, tanba sira mai la lori misaun seluk, maibé fó de’it doutrina, edukasaun islámiku ninian ba munisípiu sira ne’ebé iha sarani musulmanu. Bazeia ba regra prosedementu legál hosi regra imigrasaun, baibain estranjeiru sira mai tenke to’o loron-30 ka fulan-ida, ne’ebé to’o fulan-ida mak sira sei filafali ba sira-nia rai,” nia tenik.
Jornalista : Arminda Fonseca
Editora : Julia Chatarina
