DILI, 21 juñu 2023 (TATOLI)—Sekretaria Estadu Kooperativa (SEKoop) apoia millaun $3 ba Federasaun Hanai Malu (FHM) durante mandatu tinan-tolu.
“Durante ha’u-nia mandatu, ha’u mai iha tinan 2020, entaun iha tinan 2021 ita apoia orsamentu ba kooperativa sira liuhosi FHM hamutuk millaun $3 durante tinan-tolu, hahú hosi tinan 2021-2023,” Sekretáriu Estadu Kooperativa, Elizário Ferreira, informa ba Agência Tatoli iha ninia knaar fatin, Acait, kuarta ne’e.
Notísia relevante : SEKoop rejista kooperativa foun hamutuk 351
Nia dehan, SEKoop labele fó apoia orsamentu diretamente ba kooperativa, maibé tenke liuhosi sistema hanesan federasaun hodi simu kapitál no fó empréstimu ba kooperativa sira.
“Federasaun nia papél atu asegura, katak osan ne’e tinan ba tinan nafatin iha ema bele empresta no fó filafali jere, atu nune’e osan ne’e ema hotu iha kooperativa bele hetan benefísiu empréstimu. Tanba osan ne’e ita bolu investimentu dala-ida retornu ekonómiku sosiál ba ema hotu ne’ebé hola parte kooperativa, tanba momentu FHM simu kapitál ne’e iha kedas asina akordu, katak osan ne’e tau iha federasaun mak jere hodi fasilita sirkulasaun finanseiru, liu-liu fó asesu finanseiru ba membru kooperativa sira iha territóriu,” nia akresenta.
Tuir relatóriu, osan millaun $3 ne’ebé tau iha FHM jere hahú hosi tinan 2021 to’o 31 maiu 2023, ne’ebé tinan ne’e federasaun sirkula ona millaun $32 iha baze, kompostu hosi nasionál millaun $7 no nível baze millaun $25.
“Entaun osan ne’ebé agora sirkula iha baze hamutuk millaun $37, ida-ne’e sirkula ba membru kooperativa hamutuk 37.000 mak asesu empréstimu ida-ne’e,” governante ne’e tenik.
FHM fó kréditu osan millaun $3 ba kooperativa ho juru 2% kada tinan, maibé kooperativa fó empréstimu ba nia membru individuu ho juru 4% kada tinan.
Jornalista : Arminda Fonseca
Editora : Julia Chatarina
