DILI, 26 juñu 2023 (TATOLI)—Sekretaria Estadu Kooperativa (SEKoop) rejista kooperativa foun hamutuk 351 iha territóriu laran tomak.
“Molok ha’u seidauk simu kargu nu’udar Sekretáriu Estadu, iha Timor Kooperativa iha de’it 101, kompostu hosi kooperativa kréditu 81 no kooperativa produsaun 20. Maibé hafoin ha’u simu kargu, iha tinan 2020 to’o agora ita konsege loke ona kooperativa foun hamutuk 351, entaun daudaun ita iha ona kooperativa hamutuk 452, kompostu hosi kréditu 127 no produsaun 325,” Sekretáriu Estadu Kooperativa, Elizário Ferreira, informa ba Agência Tatoli, iha ninia knaar fatin, Acait, foin lalais ne’e.
Nia dehan, molok seidauk sai membru Governu, kooperativa iha área produsaun ladún la’o tanba momentu ne’ebá kooperativa sira depende de’it ba apoiu terseiru, ne’ebé bainhira iha apoiu mak kooperativa produsaun funsiona.
Notísia relevante : SEKoop estabelese ona loja kooperativa 10 resin iha munisípiu sira
Enkuantu, kooperativa kréditu kontinua la’o iha kualker situasaun no iha tinan 2022 konsege akumula kapitál millaun $6.
“Bazeia ba relatóriu ne’ebé ha’u simu iha loron 31 dezembru 2022, kooperativa iha Timor-Leste iha ona membru 120.000, halibur ona kapitál millaun $37, kompostu hosi produsaun ho membru 70.000 akumula kapitál millaun $4 no kooperativu kréditu ho membru 50.000 akumula kapitál millaun $33,” nia akresenta.
Kooperativa 452 ne’ebé eziste barak liu iha munisípiu, enkuantu iha Dili kooperativa iha 10, kompostu hosi kréditu hitu no produsaun tolu.
“Númeru kooperativa iha munisípiu sa’e tanba iha tinan 2020 SEKoop iha program ida hanaran Lori Joven Fila ba Kampu, nune’e iha janeiru 2020 halo formasaun ba joven sira hamutuk 200 iha territóriu laran hodi tau joven na’in rua ba kada postu administrativu,” governante ne’e esplika.
Joven sira ne’ebé hetan ona formasaun halo serbisu permanente iha nível postu to’o suku atu aumenta membru kooperativa.
“Hosi ne’e mak to’o agora kooperativa moris, tanba ita-nia membru sira kolokadu iha terrenu no kontinua fó informasaun hodi motiva komunidade tama ba kooperativa,” nia tenik.
Jornalista : Arminda Fonseca
Editora : Julia Chatarina
