SEKoop estabelese ona loja kooperativa 10 resin iha munisípiu sira
DILI, 23 juñu 2023 (TATOLI)— Sekretaria Estadu Kooperativa (SEKoop, sigla portugés) estabelese ona Loja Kooperativa hamutuk 10 resin iha munisípiu Covalima, Lautém, Dili, Manufahi Ainaro, Aileu no seluk tan.
Tanba ne’e, Sekretáriu Estadu Kooperativa, Elizário Ferreira, husu ba membru kooperativa sira atu badinas prodús produtu lokál.
“Loja Kooperativa nu’udár programa ne’ebé estabelese hosi SEKoop ho sistema SEKoop nian, ne’ebé ho espíritu kooperativizmu, katak ema ne’ebé loke Loja Koopertiva, membru mak sei fa’an produtu. Nune’e ha’u husu kooperativa sira tenke kontinua badinas kuda produtu lokál sira tanba ita iha loja rasik,” Sekretáriu Estadu hateten ba Agência Tatoli, via telefónika, sesta ne’e.
Notísia relevante : SEKoop komprometidu harii loja kooperativa iha Ainaro
Objetivu SEKoop estabelese loja kooperativa tanba nu’udar parte ida atu eduka produtór sira lori sira-nia produtu ba Loja Kooperativa, Loja do Povo no Loja Agrikultura.
“Loja sira ne’e apoiu tebes bainhira kuda produtu lokál. Sekoop fó apoiu orsamentu bainhira harii Loja Koopertiva, maibé oituan de’it, depende ba nesesidade loja nian. Osan harii loja barak liu maihosi kooperativa rasik,” nia akresenta.
Jornalista : Arminda Fonseca
Editora : Julia Chatarina
