DILI, 21 juñu 2023 (TATOLI)—Sekretaria Estadu Kooperativa (SEKoop, sigla portugés), Elizário Ferreira, hateten, hasoru difikuldade tolu iha área kooperativa durante mandatu.
“Durante ha’u-nia mandatu, iha tinan-tolu ha’u kaer SEKoop, hahú tinan 2020, dezafiu ne’ebé kooperativa sira hasoru mak líder barak seidauk iha koñesimentu di’ak kona-ba kooperativa, lakohi buka atu apreende, no sei uza hela sistema manuál,” Elizário Ferreira informa ba Agência Tatoli, iha ninia knaar fatin Acait, kuarta ne’e.
Maski nune’e, movimentu kooperativa sira konsidera dezafiu sira nu’udar oportunidade tanba liuhosi dezafiu mak bele halo ema sai kreativu halo serbisu.
“Tanba laiha dezafiu ita sei la serbisu no nia solusaun ba dezafiu sira mak ami halo retiru filafila, ho nia solusaun mak tinan ida-ne’e aselera ho formasaun, akompañamentu aprovizionamentu no auditoria, liu-liu hala’o formasaun ba líder no kooperativa sira bazeia ba job diskrisaun ne’ebé kooperativa iha,” nia akresenta.
Aleinde ne’e, SEKoop nia polítika kooperativa hamosu programa neen iha setór kooperativa durante mandatu.
“Programa neen ne’e mak fortalesimentu instituisionál, estabelsimentu kooperativa, programa kriasaun lori joven fila bá kampu, kapitalizasaun ba kooperativa, lori edukasaun formasaun no informasaun, inklui merkadu ba produtór,” Sekretáriu Estadu informa.
Notísia relevante : SEKoop: “lei ekonomia sosiál fó kbiit kooperativa sai sentru dezenvolvimentu”
Fortalesimentu instituisionál nia objetivu prinsipál mak atu asegura sustentabilidade nasionál SEKoop no movimentu kooperativa sira, hahú hosi federasaun, konfederasaun no primáriu sira.
Progresu fortalesimentu institusionál no movimentu kooperativa, ida mak reforsa infraestrutura ba movimentu kooperativa sira hodi harii sede kooperativa hamutuk 79 hosi osan subvensaun públika no parseiru ho ADRA hodi harii sede hamutuk 15, ho totál apoiu ba sede hamutuk 79.
“Kona-ba lori edukasaun formasaun no informasaun ne’e, tanba ita-nia rai menus koñesimentu kona-ba kooperativa, entaun edukasaun formasaun no informasaun sai prioridade hodi nune’e bele hasa’e númeru kooperativa, no seluk tan,” nia tenik.
Progresu serbisu durante mandatu Sekretáriu Estadu Elizário Ferreira hosi períodu 2020-2022 mak hanesan, halo revizaun orgánika SEKoop no aprova diploma ministeriál, enkuantu kona-ba funsionamentu estrutura orgánika aleinde ne’e SEKoop mós aprezenta dekretu-lei númeru 16/2004 no hetan aprovasaun ba dekretu-lei kona-ba kooperativa agríkola, kooperativa komérsiu no kooperativas peska.
Nune’e, Sekretáriu Estadu Elizário mós partisipa iha Komisaun Revizaun ba Planu Estratéjiku Dezenvolvimentu (PED) hodi introdús papél setór kooperativa no partisipa mós elaborasaun Grande Opsaun Planu (GOP) hodi introdú polítika setór kooperativa nian hodi hetan aprovasaun iha Parlamentu Nasionál.
Iha tempu kalamidade ne’ebé akontese iha loron 04 abríl tinan 2021, SEKoop iha inisiativa serbisu hamutuk ho Sekretaria Estadu Juventude no Desportu (SEJD), Ministériu Edukasaun Juventude no Desportu (MEJD), Ministériu Turizmu Komérsiu no Indústria (MTKI), Ministériu Koordenadór Asuntu Ekonómiku (MKAE) hodi fó apoiu sosiál ba família afetadu hamutuk ho montante osan $2,903 iha munisípiu Dili.
Jornalista : Arminda Fonseca
Editora : Julia Chatarina
