Lejizlatura foun presiza tau aas interese povu
OÉ-CUSSE, 22 juñu 2022 (TATOLI) –Autoridade lokál sira iha sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), husu deputadu sira VI lejizlatura tenke tau aas interese povu hanesan reprezentante povu durante mandatu iha uma fukun Parlamentu Nasionál (PN).
Notísia relevante: Ohin, PN realiza reuniaun plenária dahuluk ba lejislatura daneen
Xefe Suku Cunha, Domingos Seko Caunan, afirma, Estadu Timor-Leste harii ho ruin no raan, tán ne’e presiza tau interese aas ba povu nia hakarak, labele repete saida mak akontese iha tinan lima liubá.
“Hanesan autoridade lokál hakarak rekomenda ba Governu foun no membru parlamentu iha lejizlatura daneen, ne’ebé sei tuur iha uma fukun Parlamentu Nasionál, tenke reprezenta povu ho loloos, ita espera, katak, lori povu nia lian, labele lori partidu nia hanoin, maibé tenke tau aas interese povu ba rai ida-ne’e nia di’ak, komunidade nia preokupasaun, saida maka akontese iha ita-nia rai, presiza levanta, reprezenta povu nia lian, povu nia hanoin no preokupasaun iha uma fukun Parlamentu hadi’a rai ida-ne’e,” Xefe suku Cunha iha Oé-Cusse, ko’alia iha Oé-cusse, kinta ne’e.
Lidér lokál ne’e mós hato’o parabéns ba deputadu foun iha lejizlatura daneen, tanba ohin 22 juñu hahú haknaar-an hodi reprezenta povu iha Parlamentu Nasionál durante tinan lima.
Xefe suku Lalisuk, Hermengildo Lalisuk, haktuir, povu nia hakarak, presiza fó liman balu, atu haree ba dezenvolvimentu nasionál, tanba uluk ema hotu hakarak ukun-rasik an atu hadi’a moris.
Tán ne’e nia husu ba Governu foun presiza servisu hamutuk ho órgaun Estadu hotu-hotu, ba períodu tinan lima presiza lori dezenvolvimentu hakbesik ba povu iha área remota sira liuliu estrada, bee-moos no eletrisidade.
“Ha’u rekomenda ba nonu Governu Konstitusionál, ba períodu 2023 to’o 2028, ohin kinta ne’e orgaun parlamentu hahú abertura plenaria, ida-ne’e povu mak hili ita-boot sira tuur iha parlamentu, atu haree ba povu hotu, labele haree ba kor A ka B, tenke defende povu nia lian atu transmite ba Governu hodi haree povu nia nia hakarak, labele lori interese partidária, hanesan saida mak akontese iha tinan hirak kotuk, tanba povu hakarak moris dignu iha nia nasaun raik,” nia husu.
Liu-liu Oé-Cusse, agora komunidade sira-ne’ebé iha perténe área rurál, ejize loos Estadu no Governu Timor-Leste, atu haree kondisaun estrada, bee-moos ho eletrisidade.
“Ida-ne’e maka preokupasaun hanesan xefe suku, tanba ne’e, deputadu sira hanesan reprezenta povu nia lian, tenki rona povu, tanba durante tinan lima kotuk, povu hakilár liu maka estrada bee-moos, eletrisdade kuaze kobre ona, maib’e estrada importante atu fasilita povu hodi transporta produtu lokál bele asesu ba merkadu ho di’ak, hanesan xefe suku husu atu servisu hamutuk atu lori Timor bao in, labele hateke ba kotuk,” nia husu
Notísia relevante: Aniceto Guterres dezeja Deputadu foun lejislatura daneen
Jornalista : Abílio Elo Nini
Editór : Evaristo Soares Martins
