DILI, 22 juñu 2023 (TATOLI)—Prezidente Parlamentu Nasionál eleitu, Maria Fernanda Lay, hateten pensaun vitalísia bele hamos laiha buat ida.
Notísia Relevante: Alterasaun lei pensaun vitalísia kaduka bele kontinua iha lejislatura daneen
‘Klaru, maibé sei prioridade barak hodi serbi povu ida-ne’e, ekonomia tenke la’o, kampu traballu ami tenke serbisu hamutuk, pensaun vitalísia bele hamoos laiha buat ida,” Prezidente Parlamentu Nasionál eleitu ne’e hateten ba jornalista sira hafoin ramata reuniaun plenária dahuluk lejislatura daneen iha PN, kinta ne’e.
Nia kompromete, durante mandatu lidera lejislatura daneen sei fó prioridade ba alterasaun lei pensaun vitalísia.
“Ami sei tau matan tanba iha posibilidade maibé ha’u hakarak klarifika iha ne’e katak lei pensaun vitalísia ne’e altera tiha ona previléjiu lubun ida ami hasai tiha ona. Ezemplu, mandatu ida de’it so sira hetan de’it 60% ou 65%, karreta uluk tenke maibé agora laiha. Nune’e mós, pasaporte até ninia jerasaun sira tuir mai mós laiha só ba ki’ik ne’ebé akompaña inan-aman ba liur, tanba ne’e mak la loos katak dehan lei pensaun vitalísia ne’e não tem,” nia hateten.
Deputada Fernada Lay, hateten klaru katak vontade polítika partidu hotu-hotu nian bele sesa iha mandatu oin mai hapara pensaun vitalísia no atu submete ka tama hotu ba seguransa sosiál ninia programa.
Notísia Relevante: Bankada CNRT sei fó prioridade altera pensaun vitalísia iha lejislatura foun
Jornalista : Nelson de Sousa
Editór : Cancio Ximenes
