Parlamentu Nasionál tenke sai órgaun povu nian

DILI, 22 juñu 2023 (TATOLI)—Prezidente Parlamentu Nasionál eleitu, Maria Fernanda Lay, hateten segundu órgaun soberania Parlamentu Nasionál tenke sai órgaun povu nian.
Notísia Relevante: PN sei realiza eleisaun ba Vise Prezidente PN iha semana oin
“Parlamentu Nasionál tenke sai órgaun povu nian. Tanba, iha fatin ne’eduni ita hotu sei dignifika órgaun lejislativu ida-ne’e ho produtu lejislasaun no polítika ne’ebé aposta ba dezenvolvimentu inkluzivu. Dalan loos mak ita sei hamutuk hakat ba mudansa, hametin relasaun di’ak ho órgaun Estadu sira seluk liu-liu ho Governu no instituisun sira seluk hodi serbi di’ak liután povu,” nia Prezidente PN ne’e hateten ba jornalista sira hafoin reuniaun plenária dahuluk ba lejislatura daneen iha PN, kinta ne’e.
Nia hateten, hanesan Prezidente PN sei kria kontinuidade ba serbisu sira-ne’ebé la’o iha lejislatura dalimak no sei mantein komunikasaun bankada parlamentár hotu hodi konsolida di’ak liután funsionamentu órgaun lejislativu ida-ne’e.
“Ami ko’alia ba malu, ida-ne’e mak dala ruma ami han malu. Ha’u hanoin interrese povu nian aas liu buat hotu, ita bele iha diferensa maibé interrese komun serbi povu hotu-hotu. Kampaña mós hateten nune’e, loos ka lae. Ida-ne’e mak ita tenke hatudu ita-nia kompromisu mai iha ne’e, ida-ne’e mak ami tenke debate no tenke haree orsamentu ba povu duni, fiskaliza ho didi’ak,” nia hateten.
Dahuluk, nia dehan, halo lei no daruak fiskaliza hodi hatene orsamentu ne’ebé aprova iha PN to’o duni povu, tanba orsamentu por programa labele muda fila-fali no datoluk mak halo polítika ho étika.
Prezidente PN ne’e, kompromote durante mandatu atu garante PN funsiona di’ak liután presiza dignifika instituisaun ne’e ho ami-nia hahalok ho ami nia ko’alia importante tebes, tanba ita la dignifika instituisaun ida-ne’e oinsá mak ema seluk atu respeita, ne’ebé kaer ba konstituisaun tenke kumpre.
“Dixiplina pontualidade no ha’u sei mai tur iha ne’e tuku 09h00 dadeer, se laiha korúm lalais ami mós serbisu kle’ur, ida-ne’e labele tanba povu hein hela mudansa. Ami kompromisu no ha’u nia partidu no ha’u labele mesak, ne’e órgaun kolejiál, ami hotu tenke hamutuk,” nia hateten.
Prezidente PN eleitu ne’e hateten, kompromete mós sei tau prioridade lei komplementár seluk hodi kompleta apoiu implementasaun podér lokál no desentralizasaun administrativa.
Jornalista : Nelson de Sousa
Editór : Cancio Ximenes

