Top

PN sei realiza eleisaun ba Vise Prezidente PN iha semana oin

Prezidente Parlamentu Nasionál Eeleitu, Maria Fernanda Lay. Imajen Tatoli /Egas Cristóvão

DILI, 22 juñu 2023 (TATOLI)—Prezidente Parlamentu Nasionál eleitu, Maria Fernanda Lay, hateten sei realiza eleisaun ba Vise Prezidente Parlamentu Nasionál iha semana oin.

Notísia Relevante: Maria Fernanda Lay feto dahuluk lidera lejislatura daneen

“Ida-ne’e próxima semana, tanba tempu la to’o. Ha’u espera katak, ami-nia membru meza mós bele koopera tanba iha serbisu todan barak tenke hala’o, agora de’it mós ha’u foin eleita. Asesór sira mai ho dokumentu, ne’ebé husik ha’u dada iis lai,” ’Prezidente PN eleitu ne’e hateten ba Agência Tatoli hafoin reuniaun plenária dahuluk ba lejislatura daneen iha PN, kinta ne’e.

Iha reuniaun plenária dahuluk lejislatura daneen bankada maiória parlamentár CNRT ho kadeira 31 no PD kadeira neen (6) ne’ebé ho forsa polítika maiória parlamentár kadeira 37, enkuantu bankada opozisaun FRETILIN kadeira 19, KHUNTO lima (5) no PLP iha kadeira haat (4).

Bankada maiória parlamentár CNRT-PD propoin kandidatu lista úniku Deputada Maria Fernanda Lay hosi bankada CNRT ne’ebé liu-hosi votasaun iha plenária eleitu ho votu a-favór 45, kontra 0, abstensaun 19 no votu branku ida.

Prezidente PN eleitu ne’e hateten, ko’alia kona-ba kargu ba Vise Prezidente PN ne’ e sei okupa hosi PD rasik.

“Ha’u lahatene, ami sei ko’alia, konserteza tenke fahe,” nia hateten.

Tuir rejimentu Parlamentu Nasionál iha artigu 18 (Meza), Meza Parlamentu kompostu hosi Prezidente Parlamentu, Vise Prezidente na’in-rua, Sekretáriu ida (1) no Vise Sekretáriu na’in-rua (2).

Tuir rejimentu PN artigu 19 (Eleisaun ba Vise-Prezidente, Sekretáriu no Vise-Sekretárih), iha alínea 1 ne’e hateten, Vise-Prezidente sira, Sekretáriu, no Vise-Sekretáriu sira ne’e eleitu ba lejislatura ida.

Iha alínea 2 ne’e haktuir, kandidatura kargo Vise-Prezidente, Sekretáriu no Vise-Sekretáriu PN tenke subskreve hosi mínimu deputadu na’in-ualu (8) no máximu na’in-12, no aprezenta liu-hosi lista fesada, kompleta no nominativa.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!