iklan

NASIONÁL, POLÍTIKA

Maria Fernanda Lay feto dahuluk lidera lejislatura daneen

Maria Fernanda Lay feto dahuluk lidera lejislatura daneen

Prezidente Parlamentu Nasionál Eeleitu, Maria Fernanda Lay hamutuk ho Prezidente Parlamentu Nasionál sesante, Aniceto Longuinhos Guterres Lopes..Imajen Tatoli /Egas Cristóvão.

DILI, 22 juñu 2023 (TATOLI)–Deputadu/a lejislatura daneen liuhosi eleisaun iha Parlamentu Nasionál (PN), kinta ne’e, hili Deputada Maria Fernanda Lay feto dahuluk hosi Bankada CNRT, hodi sai Prezidente Parlamentu Nasionál, atu lidera lejislatura daneen durante tinan lima (2023-2028).

Notísia Relevante: Ohin, PN realiza reuniaun plenária dahuluk ba lejislatura daneen

Kandidatu lista úniku hosi koligasaun CNRT-PD sai Prezidente PN hodi troka Prezidente PN sesante Aniceto Longuinhos Guterres Lopes ho rezultadu votasaun a-favór 45, kontra 0, abstensaun 19 no votu branku ida (1).

Prezidente Parlamentu Nasionál Eeleitu, Maria Fernanda Lay. Imajen Tatoli /Egas Cristóvão

“Nune’e, rezultadu mak ne’e, Deputada Maria Fernanda Lay eleita ba Prezidente Parlamentu Nasionál primeira mullher Timorense titular órgaun soberania. Tanba ne’e, parabéns ba Deputada Feranda Lay no parabéns ba feto Timor-Leste no povu Timor-Leste, Prezidente PN sesante Aniceto Longuinhos Guterres Lopes, fó sai iha sala plenária PN.

Ho nune’e, Prezidente PN sesante lidera meza to’o iha ne’e mandatu ramata, no konvida direta Prezidente PN eleitu hodi simoboliza entrega karta simu transferénsia meza PN.

Iha diskursu, Prezidente Eleitu ba lejislatura daneen, Maria Fernanda Lay, promete durante mandatu sei kumpre de’it kna’ar tuir de’it konstituisaun.

“Ita hotu sei hamutuk hala’o mandatu tuir de’it konstituisaun haruka nu’udar lejisladór, fiskalizadór no desizaun polítika,” nia hateten.

Nia kompromete sei fó kontinuidade ba serbisu sira-ne’ebé la’o hosi Prezidente PN sesante sei mantein komunikasaun ho sira no sei dere bankada ida-idak nia odamatan, no Deputadu sira ida-idak hodi konsolida di’ak liután funsionamentu órgaun lejislativu ida-ne’e.

“Parlamentu Nasionál aliende tenke sai órgaun povu nian, iha fatin ne’eduni ita hotu sei dignifika órgaun lejislativu ida-ne’e ho produtu lejislasaun no polítika ne’ebé aposta ba dezenvolvimentu inkluzivu, dalan loos mak ita sei hamutuk hakat ba mudansa, hametin relasaun di’ak ho órgaun Estadu sira seluk liuliu ho Governu no instituisun sira seluk hodi serbi di’ak liután povu,” nia hateten.

Prezidente PN eleitu ne’e, fiarmente hamutuk Deputadu na’in 64 iha PN, serbisu komisaun espesializada parlamentár sei funsiona di’ak liután, no sei mantein relasaun di’ak ba partidu hotu-hotu, hametin relasaun ho mídia no órganizasaun naun governamentál sira, no fortalese grupu amizade parlamentár ho nasaun sira seluk ASEA, CPLP no sira seluk.

Segundu órgaun soberania PN iha lejislatura daneen simu naha todan tanba tenke konsolida hikas instrumentu legal sira atu responde povu nia hakarak, tanba iha tempu naruk atu haree no rona povu lakohi atu hein kle’ur tan.

Notísia Relevante: Governasaun demokrátika permite ko-ezisténsia forsa polítika governativa- opozisaun konstrutiva

Nia apela ba komponente sira hotu liuliu funsiona PN hotu atu kolabora malu tenke serbisu hamutuk, hametin ekipa no presta deputadu sira-nia dezempeñu ho dedikasaun, tanba povu hein hela hakarak moris di’ak lalais no Estadu ezije atu rekupera Timor-Leste nia ekonomia, no joven barak hakarak empregu no setór privadu hakarak ambiente negósiu ida-ne’ebé saudável.

Tamba ne’e, papél PN tenke foti nu’udar instituisaun katalisadór ba Governu tuir mai atu serbisu ezekutivu nian la’o di’ak, Governu foun mai ne’e tenke lori programa pro povu no orsamentu ne’ebé mak bele responde duni povu nia moris.

Ikus liu, nia hato’o agradesimenu no konfiansa hosi Prezidente Partidu CNRT, Kay Rala Xanana Gusmão ho Sekretáriu Jerál Franisco Kalbuady Lay no estrutura Partidu Demokrátiku ba fiar tomak.

Deputadu eleitu lejislatura daneen 65 halo juramentu

Deputadu/a lejislatura daneen hasai retratu hamutuk ho Prezidente Parlamentu Nasionál Eeleitu, Maria Fernanda Lay, kinta (22 juñu 2023). Imajen Tatoli/António Daciparu.

Antes tama ba eleisaun Prezidente Parlamentu Nasionál, Prezidente PN sesante halo uluk nomeasaun sekretáriu en-exersísiu, no diskusaun votasaun projetu deliverasaun númeru 1/VI-konstituisaun komisaun verifikasaun podér ne’ebé aprova ho votu a-favór 64, kontra 0 no abstensaun 0, Deputadu hosi PLP, Taur Matan Ruak auzente, hosi totál Deputadu na’in-65.

Hafoin ne’e reinísiu reuniaun plenária, koomisaun verifikasaun leitura relatóriu ne’ebé lee mós naran Deputadu eleitu hamutuk na’in-65, no votasaun relatóriu komisaun verifikasaun podér,

Nune’e plenária apresia votasaun ba relatóriu komisaun eventuál hodi verfika no konfirma deputadu eleitu hosi Tribunál Rekursu nian, ho votu a-favór 64 kontra 0, abstensaun 0.

“Mandatu Deputadu verifikadu no konfirmadu, Tanba verifikadu no konfirmadu tuir ajenda hakarak ba presta juramentu hosi Deputadu sira,” Prezidente sesante PN, Aniceto Guterres fó sai iha sala plenária.

Hafoin juramentu Deputadu, Prezidente PN sesante, hato’o ajenda no tuir mai eleisaun ba meza Prezidente PN, maibé rezolve uluk Deputadu substituisaun.

Hanesan substituisaun temporáriu Deputadu Taur Matan Ruak hosi Abel dos Santos hodi Partidu Libertasaun Populár (PLP).

Nune’e mós substituisaun Deputadu hosi CNRT, Kay Rala Xanana Gusmão tanba serbisu polítiku seluk nune’e labele kontinua tuir plenária, hodi subtítui fali Deputadu CNRT Domingos Deker.

Tuir mai susbtituisaun temporáriu Deputadu na’in-tolu hosi bankada FRETILIN, Francisco Guterres Lú-Olo, Mari Alkatiri, ho Lere Anan Timur.

Hafoin ne’e, Prezidente PN sesante kontinua kedas ajenda eleisaun ba Prezidente PN foun tuir artigu 16 rejimentu PN, kandidatu tenke tama iha meza PN sesante iha oras 24.

Fó sai katak, iha 15 juñu hala’o enkontru ho partidu lima hetan asentu iha parlamentár, no hosi reuniaun ne’e aviza kedas maibé ajenda iha tuku 10h00 iha loron 21 juñu aprezenta kandidatu.

“To’o agora lista kandidatu ida, kumpre duni 24 oras, tanba lista ne’e ho entrega meza prezidente sesante, plenária ida mak soberanu,” nia dehan.

Nune’e, avansa eleisaun Prezidente PN, iha kandidatu ida hosi partidu CNRT no karta aseitasaun hosi PD, meza konfirma kandidatu prienxe rekezitu hotu, hafoin sekretária meza lee sai, hodi prosde kedas ba votasaun.

Biografia Maria Fernanda Lay

Maria Fernanda Lay moris iha munisípiu Baucau iha loron 10 fulan-novembru tinan 1954. Ninia abilitasaun akadémika baixarelatu hosi akadémia Telecom Bandung-Indonézia.

Hanesan Deputada hosi bankada CNRT hosi lejislatura daruak to’o dalimak, iha lejislatura datoluk hanesan sekretária meza PN, no durante hanesan Deputada lidera mós hanesan Prezidente komisaun C trata asuntu Finansa Públika no asume mós kna’ar importante sira seluk tan.

Lista Deputadu lejislatura daneen 

Deputadu lejislatura daneen hamutuk na’in 65 kompostu hosi CNRT mak hanesan Kay Rala Xanana Gusmão, Francisco Kalbuadi Lay, Maria Terezinha Da Silva Viegas, Duarte Nunes, Aderito Hugo Da Costa, Maria Fernanda Lay, Jose Virgilio Rodrigues Ferreira, Luis Ximenes Caldeira, Maria Rosa Da Camara ‘Bisoi’, Domingos Lopes Lemos, Marcus Xavier, Bendita Moniz Magno, Oscar De Araujo, Firminio Taequi, Veneranda E.M. Lemos Martins, Domingos Da. C. Dos Santos, Rogerio Araujo Mendonça, Virginia Ana Belo, Gabriel Soares, Saul Salvador H.J. Amaral, Maria Gorumali Barreto, Patrocinio Fernandes Dos Reis, Virglio Pereira, Cedelizia Faria Dos Santos, Francisco Da Costa ‘Ikulay’, Albino Da Silva, Carminda Carlota, Ricardo Baptista, Anacleto Freitas, Alianca Da Conceição Araujo e Mateus Da Cruz De Carvalho.

Deputadu FRETILIN mak Mari Bim Amude Alkatiri, Francisco Guterres “Lú-Olo”,Maria Angélica Rangel da Cruz dos Reis, Tito da Costa Cristovão “Lere Anan Timur”, Aniceto Longuinhos Guterres Lopes, Lidia Norberta dos Santos Martins, proposto pelo partido político FRETILIN, Antoninho Bianco, David Dias Ximenes, Helena Martins Belo, Joaquim dos Santos, Antonio Moniz Calau, Maria Anabela Sávio,     Nurima Ribeiro Alkatiri, José da Cruz,  Cristina Yuri Rebelo Dos S. Costa, Abilio Quintão Pinto, Florentino Ximenes da Costa “Sinarai”, Mariquita Soares e Oscar Lima.

Deputadu PD hanesan Mariano Assanami Sabino Lopes, António da Conceição, Maria Teresa da Silva Gusmão, Alexandrino Afonso Nunes, Julio do Carmo no Sancha Margarida Tilman.

Deptuadu KHUNTO mak Armanda Berta dos Santos, António Verdial de Sousa, António Verdial da S. Ferreira, Olinda Guterres no Luis Roberto da Silva.

Deputadu PLP mak Taur Matan Ruak, Helder Freitas, Maria Angelina Lopes Sarmento no Adolfo Martins.

Substituisaun

Deputadu PLP Taur Matan Ruak, substitui hosi Abel dos Santos, Deputadu FRETILIN na’in-tolu mak substitui hanesan, Tito da Costa Cristovão ‘Lere Anan Timur’ substitui hosi Dário Madeira.

Mari Alkatiri subtitui hosi Antoninho Doutel Sarmento no Francisco Guterres ‘Lú-Olo’, substitui hosi Sancia Florencia.

Deputadu CNRT José Alexandre Kay Rala Xanana Gusmão, substitui hosi Domingos Agostinho.

Notísia Relevante: Aniceto Guterres dezeja Deputadu foun lejislatura daneen

 Jornalista : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!