DILI, 22 juñu 2023 (TATOLI)–Diretór Nasionál Empregu Exteriór (DNEE) hosi Sekretaria Estadu Formasaun Profisionál no Empregu (SEFOPE), Filomeno Soares, hateten, informasaun ne’ebé espalla iha rede sosiál kona-ba Polísia Imigrasaun Koreia Súl kaer timor-oan na’in-lima ne’e loos tanba sira komete serbisu ilegál ka sai ona hosi sistema.
“Loos, ha’u foin konfrma ho Adidu Timor-Leste iha Koreia Súl, katak informasaun Polísia Imigrasaun Koreia Súl kaer timor-oan na’in-lima ne’e loos tanba sira sai hosi sistema no serbisu ilegál iha área peska, nune’e Polísia kaer sira,” Diretór informa ba Agência Tatoli, iha ninia knaar fatin, Becora, kinta ne’e.
Notísia relevante : Traballadór timor-oan 1.350 iha Austrália no Koreia Súl sees hosi sistema
Daudaun autoridade seguransa detein hela sira hodi halo verifikasaun dokumentu no sei haruka sosa billete hodi deporta.
“Polísia kaer sira ne’e deskonfia dala-ruma sira komete problema ruma, lae sira la’o sala momentu Polísia sira halo hela pasa revista, automátikamente Polísia kaer ona sira tenke deporta tanba rejistu ona iha sistema, ne’ebé sira fila mai durante tinan-hitu labele tama Koreia Súl tanba iha ne’ebá ema-nia lei la aplika konvensaun direitu umanu, ne’ebé ita bele livre hanesan iha Austrália mós ema la kaer,” nia akresenta.
Relasiona ho situasaun ne’e, Diretór husu ba traballadór sira iha Koreia Súl hodi mantein nafatin iha sistema.
“Husu nafatin traballadór sira ne’ebé daudaun iha ona Koreia Súl atu matein nafatin iha sistema nune’e imi-nia vida empregadór garantidu, lae imi sai hosi sistema ema kona imi sei kaer no deporta. Ha’u husu traballadór sira ne’ebé bá ona serbisu iha Koreia Súl no agora prepara-an atu bá tenke kumpre nafatin regra sira ne’ebé iha tanba área peska no fábrika imi na’in rasik mak hili ba serbisu, ne’ebé respeita regra, liu-liu labele sees hosi sistema,” nia hameno.
Jornalista : Arminda Fonseca
Editora : Julia Chatarina
