AMTL sujere Governu tau importánsia ba setór marrítima
DILI, 23 juñu 2023 (TATOLI)—Asosiasaun Mariñeiru Timor-Leste (AMTL) sujere ba IX Governu atu tau importánsia ba setór marrítima iha Timor-Leste tanba konsidera tasi importante ba dezenvolvimentu nasaun.
“Hakarak sujere ba Governu ne’ebé sei forma hosi Partidu CNRT no PD, katak hakarak halo mudansa karik halo mós mudansa rigorozu ba iha setór marrítima nian tanba durante tinan barak ita-nia setór marrítima ne’e patina iha fatin ka laiha mudansa,” Prezidente AMTL, Simplício Ximenes, hateten liuhosi programa live streaming entrevista eskluziva Agência Tatoli, iha estúdiu Farol, sesta ne’e.
Notísia relevante : AMTL eziste akumula rekursu umanu hodi responde ba demanda setór marrítima
Prezidente asosiasaun dehan, iha timor-oan ne’ebé estuda iha área marrítima nune’e bele enkaixa hodi bele kontribui ba serbisu sira.
“Presiza kria regra rasik hodi nune’e rekursu sira ne’ebé iha, bainhira tama idade reforma iha ona rekursu subtitutu,” nia fó hanoin.
Simplício Ximenes husu mós atu aselera lei ne’ebé iha tanba ne’e sai obstákulu ba mariñeiru sira atu bá serbisu iha rai-li’ur tanba Timor-Leste nia lei hodi regula seidauk iha.
“Maski nune’e ami prontu apoia atividade sira ligadu ho área tasi nian,” nia akresenta.
Iha loron mundiál mariñeiru, AMTL sei halo promosaun liuhosi mídia hodi apela ba públiku kuidadu ambiente tasi, tanba tema nasionál ba loron mundiál mariñeiru ba tinan 2023 maka ‘kontribuisaun mariñeiru hodi proteje ambiente tasi’.
“Baibain loron 25 juñu, ami sempre komemora loron mundiál mariñeiru, Timor-Leste sai mós membru ba organizasaun mundiál marrítima nian. Komemora loron mundiál ne’e hodi valoriza mariñeiru sira ne’ebé transporta sasán hosi rai ida bá rai ida, tanba ne’e atividade ne’ebé AMTL halo maka sei partilla informasaun sira-ne’e liuhosi mídia hodi fó hatene ba utente sira ne’ebé uza tasi tenke kuidadu ambiente tasi nune’e husik tasi ne’e furak nafatin hodi ita bele la’o tanba tasi sai hanesan ita-nia fatin hodi hala’o knaar,” nia tenik.
Ligadu ho loron mundiál mariñeiru, Prezidente asosiasaun apela ba públiku no foin-sa’e sira ne’ebé daudaun estuda hela iha área mariña atu aproveita tempu ho didi’ak no bainhira hasoru difikuldade ruma bele husu apoia ba asosiasaun.
Jornalista : Antónia Gusmão
Editora : Julia Chatarina
