DILI, 23 juñu 2023 (TATOLI)–Timor-oan lubuk ida forma Asosiasaun Mariñeiru Timor-Leste (AMTL) ho vizaun ida atu akumula rekursu umanu hodi responde ba demanda setór marrítima.
“Objetivu asosiasaun maka atu akumula hamutuk rekursu ne’ebé iha, nune’e demanda ruma mai hosi setór marrítima nian ita prontu atu responde,” Prezidente AMTL, Simplício Ximenes hateten liuhosi programa entrevista eskluziva live streaming, iha estúdiu Agência Tatoli, sesta ne’e.
AMTL harii iha tinan 2019 ho membru 96, hafoin fahe informasaun liga ho vizaun no misaun asosiasaun nian, konsege akumula membru hamutuk 203.
“Membru sira-ne’e ninia esperiénsia edukasaun tenke mai hosi área marrítima nian, katak hotu-hotu tenke mai hotu hosi área tasi nian. Tanba ne’e, ami foti ema hirak ne’ebé background ketak-ketak maibé serbisu hotu iha tasi nian,” nia akresenta.
Notísia relevante : AMTL Husu Governu Dignifika Mariñeiru Timor-oan Ne’ebé Servisu iha Ró
Atividade prinsipál ne’ebé asosiasaun implementa desde tinan 2019 to’o 2023 maka konsege halo sosializasaun ezisténsia asosiasaun ba entidade sira, estabelese baze dadus hodi halibur membru sira ne’ebé hakarak rejista sai membru asosiasaun, no komunika ba Konfederasaun Sindikatu Timor-Leste (KSTL) kona-ba ezisténsia.
Programa balun ne’ebé halo maka sai hanesan formadór iha sentru formasaun Tibar, katak fó formasaun ba mariñeiru sira ne’ebé sertifikadu inválidu no kursu ba mariñeiru foun. Hafoin ne’e asosiasaun mós hakbesik-an barak ba entidade hotu hodi husu aseitasaun ba timor-oan sira karik atu serbisu iha área marrítima nian. Daudaun ne’e membru asosiasaun balun hetan ona postu serbisu iha área marrítima nian.
Prezidente asosiasaun argumenta tan katak, asosiasaun ne’e naun lukrutivu, ne’ebé laiha kapasidade atu kapasita membru sira, liu-liu haruka ba tuir formasaun iha rai-li’ur maibé sujere ba Fundu Dezenvolvimentu Kapitál Umanu (FDCH, sigla portugés) baihira loke bolsa estudu karik fó oportunidade ba membru iha área marrítima.
“Harii asosiasaun ida sempre iha difikuldade, maibé tanba pasiénsia no loke komunikasaun ba malu nune’e asosiasaun bele eziste nafatin no buka apoia ekipamentu informátika hosi doadór,” nia adianta.
Jornalista : Antónia Gusmão
Editora : Julia Chatarina
