iklan

EKONOMIA, BOBONARO, HEADLINE, MUNISÍPIU

Bee-moos sufisiente ba konsumidór Maliana iha tempu bailoro

Bee-moos sufisiente ba konsumidór Maliana iha tempu bailoro

Koordenadór Bee Timor-Leste, Empreza Públika (BTL,E.P) munisípiu Bobonaro, Adriano da Cruz. Imajen Tatoli/Sérgio da Cruz.

MALIANA, 23 juñu 2023 (TATOLI) – Koordenadór Bee Timor-Leste, Empreza Públika (BTL,E.P) Munisípiu Bobonaro, Adriano da Cruz, garante bee-moos sufiente atu halo distribuisaun ba konsumidóe kapitál Maliana iha tempu bailoro.

Nia subliña, maski besik tama ona ba tempu bailoro daudaun ne’e atendimentu bee-moos ba komunidad sira normál hela.

Alende tékniku sira hamutuk ho komunidade suku Holsa, durante semana ida ona halo manutensaun ba sistema kanu transmisaun bee-moos poligada 110 mm ka 6 inch iha Taugol, liga hosi bee-matan Beremau ne’ebé antes ne’e hetan estragu hosi inundasaun.

Nia espara bee-matan Beremau iha tempu badak sei funsiona normál, alende ne’e fonte poténsia liuliu sistema bombajen iha Lesupuh, Lahomea mós komesa operasionaliza ona hosi suporta, hodi asegura bee-moos ba komunidade sidade urbana Maliana.

Notísia relevante: BTL,EP Bobonaro sei mellora sistema bee-moos ho kualidade

“Espara katak bee-moos natoon hela tanba klima udan di’ak, bee-matan Beremau no Biapelu  mós ami ba observa ninia volume ka kapasidade mós sei boot, tanba ami espera bee sei sufisiente, naran katak ema hotu-hotu tenke disiplina uza bee tuir duni nesesidade. Ita labele uza tuir ita-nia gostu,” nia informa ba jornalista sira iha Maliana, sesta ne’e.

Nia subliña, BTL,E.P sei la garante fornese bee durante 24 oras maibé sei loke tuir oráriu ne’ebé estabelese ona.

“Ita-nia komunidade balu bele hetan dadeer, balun lokraik, balu bele hetan loron ida ka rua, maibé agora daudaun ein-erál ita avalia katak normalmente dadeer  no lokraik, parese balu iha Holsa mak ita fó loron ida-ida,” nia katak.

Nia konfirma, problema ne’ebé durante ne’e BTL,E.P identifika ba kuaze bee laiha, tanba menus rekursu umanu liuliu operador sira atu asegura no halo komtrolu ba sistema gravitasaun haat ne’ebé durante ne’e fornese bee-moos ba kliente sira iha kapitál munisípiu Bobonaro.

Daudaun ne’e BTL,E.P instala ona metru kontadór hamutuk unidade 1,118, nune’e kliente hosi númeru ne’e inklui balu ne’ebé seidauk rejista mak kompre devér selu taxa ba estadu kada fulan.

“Ha’u husu ba komunidade sira-ne’ebé halo ligasaun ilegál no sira-ne’ebé seidauk rejista atu mai selu taxa, tanba nasaun ne’e ita mak tenke kontribui. Sé lakohi kontribui loron ida ita sei ba regulariza sasán sira-ne’e hodi hatama reseita ba estadu,” nia apela.

Notísia relevante: Kanu bee-moos unidade 50 lakon iha Galusapulu

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!