iklan

EKONOMIA, BOBONARO, HEADLINE, MUNISÍPIU

Kanu bee-moos unidade 50 lakon iha Galusapulu

Kanu bee-moos unidade 50 lakon iha Galusapulu

Koordenadór Bee Timor-Leste, Empreza Públika (BTL,E.P) munisípiu Bobonaro, Adriano da Cruz. Imajen Tatoli/Sérgio da Cruz.

MALIANA, 23 Juñu 2023 (TATOLI) – Koordenadór Bee Timor-Leste, Empreza Públika (BTL,E.P), munisípiu Bobonaro, Adriano da Cruz, fó-sai katak, ema deskoñesidu ‘na’ok’ kanu transmisaun bee-moos hamutuk lolon ka unidade 50 iha aldeia Galisapulu, suku Lahomea, postu administrativu Maliana, munisípiu Bobonaro.

Notísia relevante: Tinan 2022, BTL Bobonaro rekolla reseita rihun $35-resin

“Ema deskoñesidu na’ok pipa bee-moos iha bee-matan Biapelu, aldeia Galusapulu. Akontesimentu ne’e ami deskobre iha loron 01 maiu fulan kotuk, bainhira tékniku operadór BTL nian dezloka ba iha terrenu mak deskobre sasán sira-ne’e totál pipa hamutuk unidade 50, ita konta ba osan karik $30 juta ,” nia informa ba jornálista sira, iha Maliana, sesta ne’e.

Hafoin akontesimentu ekipa BTL hamutuk ho autoridade lokál, Polísia Nasionál Timor-Leste, eskuadra Maliana no komunidade sira tún kedas ba lokalidade akontesimentu ho rekolla informasaun.

Nune’e Prezidente  BTL,E.P rasik mós orienta Diresaun Operasaun no Manutensaun dezloka kedas ba terrenu iha semana kotuk maibé to’o agora seidauk deskobre autor ba asaun refere.

“Ha’u hanoin BTL,E.P iha regra rasik, estraga ka halakon patrimóniu estadu, ita bele prosesa bainhira ita hetan ona autór ba asaun sira-ne’e, maibé neste momentu ita seidauk hetan, autór ne’ebé komete violasaun sira-ne’e, bainhira hetan ita sei aplika regra hodi nune’e fó imajen ba komunidade sira seluk atu labele akontese tán,” nia katak.

Jerente BTL,E.P Munisípiu ne’e konfirma parte sentrál mós preukupa, maibé foti ona konluzaun katak iha tempu badak sei re-instala sistema refere hodi kanaliza bee-moos ba komunidade ho normál.

“Iha dia 26 agora ami sei enkontru no halo akordu ho autoridade lokál aldeia Galusapulu, depois ita bele mobiliza materiál ne’ebé maka hetan apoia másimu hosi BTL sentrál hodi re-instala semana sira-ne’e,” nia hateten.

Koordenador BTL,E.P Munisípiu ne’e lamenta ho asaun ka atitude ema deskoñesidu ne’e, tanba sistema refere estadu instala atu fornese bee-moos ba komunidade hotu-hotu hodi atende  ba nesesidade kada loron.

“Sistema ne’e lori bee-moos ne’e lori moris ba ema barak, tanba ne’e ha’u husu labele estraga sistema sira-ne’e, tanba uluk ita iha tempu riksu funu 1999 ita esforsu hakarak liberta ita-nia rai, maibé ikus ema Indonézia sira sai mós la estraga sistema bee ida,” nia afirma.

Tuir dadus ne’ebé rekolla iha terrenu, ema deskoñesidu sobu sistema transmisaun bee-moos ida ne’e, ho distánsia metru atus tolu (300 m), ho kanu poligada milimetru 80 ka 3inch ne’e iha unidade 22, poligada mimimetru 50 ka 2inch ne’e hamutuk unidade 28.

Notisia relevante: BTL, E.P inisia fornese bee-moos ba komunidade Bobonaro no Covalima

Jornalista   : Sérgio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!