DILI, 23 juñu 2023 (TATOLI) – Prezidente Institutu Politékniku Betanu (IPB), Acácio Cardoso Amaral, hatete Ministériu Ensinu Superiór, Siénsia no Kultura (MESSK) seidauk indemniza família 50-resin ne’ebé okupa rai IPB tanba falta dadus okupante.
Acácio Cardoso esplika katak pagamentu ba família sira ne’e seidauk realiza tanba levantamentu dadus ne’ebé halo latuir dokumentu projetu ne’ebé prepara husi MESSK, tanba ne’e ministériu foin submete fali segunda lista ba Konsellu Ministru hodi hetan aprovasaun.
“Dadus primeiru ne’ebé hetan ona levantamentu no tama ona iha lansamentu fatuk dahuluk husi na’i Primeiru-Ministru iha tinan kotuk ne’e iha de’it rai hamutuk ektare sanulu ho totál okupante besik 40. Maibé, tuir dokumentu projetu ne’ebé Ministériu Ensinu Superiór iha, IPB nia rai hamutuk ektare 15 ne’ebé identifika totál okupante hamutuk 50-resin”, prezidente afirma ba Tatoli via telefone.
Ba problema dadus ne’ebé iha maka ministériu halo fali levantamentu ba rai ektare lima ne’e hodi submete fali ba Konsellu Ministru, tanba ne’e maka halo tarde iha prosesu pagamentu ba okupante sira iha rai IPB ne’e.
“Ha’u rona katak levantamentu dadus segundu ba rai ektare lima ho okupante família 16 nian hetan ona aprovasaun, bainhira públika ona iha Jornál Repúblika mak foin halo pagamentu dala ida de’it. Ne’ebé ita kontinua hein prosesu ne’ebé sei tuirmai,” Acácio dehan.
Tanba mandatu Ministériu Ensinu Superiór kauze remata ona mana IPB sujere ba ministru atu halo mós rekomendasaun bá Governu Dasiak hodi bele kontinua tau importánsia ba asuntu ne’e, bainhira ministru foun mai bele aselera prosesu pagamentu ba okupante rai IPB nian.
Rekorde katak MESSK prevee ona orsamentu ho montante $22.486 ba indemnizasaun komunidade afetadu projetu konstrusaun Institutu Politékniku Betanu. Verba ne’e atu fó indemnizasaun ba de’it uma-kain 40.
Notísia relevante: Governu define montante alokasaun uzu terrenu ba instalasaun IPB
Jornalista: Tomé Amado
Editora: Maria Auxiliadora
