DILI, 10 maiu 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu ne’ebé aprezenta hosi Ministru Ensinu Superiór Siénsia no Kultura, Longuinhos dos Santos, kona-ba definisaun montante alokasaun uzu terrenu ba implementasaun instalasaun Institutu Politékniku Betanu (IPB) iha munisípiu Manufahi.
“Projetu ida-ne’e hanesan obra fundamentál ida hodi hadi’a di’ak liután ensinu superiór públiku nasionál hodi buka atu kapasita no hadi’a kualidade rekursu umanu iha Timor-Leste no nível tékniku”, Ministru Prezidénsia Konsellu Ministru, Fidelis Manuel Leite Magalhães, hateten hafoin reuniaun ezekutivu iha Palásiu Governu, kuarta ne’e.
Montante másimu ne’ebé prevee iha tabela anexa ba rezolusaun Governu ne’e fahe tuir tipu konstrusaun edifísiu, kultura, agríkola no sasán di’ak sira seluk ne’ebé eziste iha terrenu sira ne’ebé inklui ona ba projetu konstrusaun instalasaun IPB.
Primeiru-Ministru, Taur Matan Ruak, akompaña hosi Ministru Ensinu Superiór Siénsia no Kultura, Longuinhos dos Santos, no entidade relevante sira, antes ne’e halo lansamentu fatuk dahuluk ba konstrusaun fíziku IPB, iha suku Betano, postu administrativu Same Vila, munisípiu Manufahi.
Projetu konstrusaun IPB hatuur ho objetivu atu hakbiit rekursu umanu ho kualidade iha Timor-Leste liuhosi área prioridade, ne’ebé determina tuir nesesidade dezenvolvimentu nasionál, desentraliza ensinu superiór no hasa’e ekonomia lokál iha nível munisípiu. Konstrusaun IPB sai nu’udar projetu prioritáriu ida ba dezenvolvimentu setór edukasaun no kualifikasaun rekursu umanu, ne’ebé ninia implementasaun hatuur iha Timor-Leste nia planu estratéjiku tinan 2011 to’o 2030.
Notísia relevante: Projetu konstrusaun IPB hatuur objetivu hakbiit rekursu umanu ho kualidade
MESSK hahú aprezenta planu ba Primeiru-Ministru iha tinan 2018 no hetan rekomendasaun pozitiva atu hahú konstrusaun, nune’e iha tempu hanesan ministériu hahú submete proposta projetu ho kustu inisiál $21.895.000 no hafoin submisaun ba Ministériu Obra Públika (MOP) hodi halo verifikasaun, mak aprezenta kustu revizaun finál ho montante $18.369.000.
Konsellu Administrativa Fundu Infraestrutura (KAFI) bainhira halo diskusaun iha tinan 2021 atu asegura disponibilidade orsamentu konstrusaun, hafoin MESSK submete proposta konstrusaun ba Sekretaria Grande Projetu (SGP) hodi orsamenta ba tinan orsamentu 2022, ne’ebé verifika ona hosi MOP ba Ajénsia Dezenvolvimentu Nasionál (ADN) atu halo verifikasaun finál.
Ekipa responsável sira deside dimensaun projetu ho orsamentu ne’ebé haree ba kresimentu instituisaun relevante sira hodi deside konstrusaun tuir faze, nune’e, MESSK propoin orsamentu ba konstrusaun $4.540.962,89 ba tinan 2022 iha faze dahuluk, hosi totál $18.369.000 ne’ebé destinadu atu asegura konstrusaun landscape no infraestrutura.
MESSK submete pedidu konkursu públiku ba Komisaun Nasionál Aprovizionamentu (CNA, asigla portugés) iha fevereiru 2022, atu loke konkursu ba servisu konstrusaun no supervizaun nian.
Ho nune’e, empreza Chongqing International Construction Corporation (CICO) mak sai manán-na’in ba projetu, ho proposta submisaun ba konstrusaun hamutuk $3.961.658,78, ho duransaun serbisu fulan-12.
Ba servisu supervizaun nian, hafoin prosesu konkursu públiku dala-rua, Ia konsege hetan empreza elejível atu asegura supervizaun.
MESSK propoin ba KAFI atu buka alternativa seluk hodi bele asegura konstrusaun faze dahuluk, nune’e hafoin reuniaun KAFI iha loron 18 agostu 2022, liuhosi deliberasaun númeru 55/VII/CAFI/2022, deside katak servisu supervizaun sei hetan responsabilidade hosi ekipa téknika MOP no MESSK.
Jornalista : Antónia Gusmão
Editora : Julia Chatarina
