VIQUEQUE, 23 juñu 2023 (TATOLI)—Guarda Florestál munisípiu Viqueque hamutuk na’in-20 partisipa formasaun téknika, hosi ekipa Korpu Guarda Florestál (CGF, sigla portugés) nasionál hosi Ministériu Agrikultura no Peska (MAP) durante loron-rua, hahú sesta (23/06) to’o sábadu (24/06).
Diretór Servisu MAP Viqueque, Fernando Joaquim, hateten Guarda Florestál sira presiza nafatin simu kapasitasaun hodi eleva koñesimentu.
“Ohin ekipa hosi Korpu Guarda nasionál sira mai munisípiu Viqueque hodi fó formasaun ba Guarda Florestál sira tanba formasaun ne’e importante atu sira bele simu materiál liga ba tékniku no guarda hodi implementa iha sira ida-idak ninia área ne’ebé koloka ba postu lima,” Diretór informa iha edifísiu MAP Viqueque, Beloi, sesta ne’e.
Notísia relevante : Guarda Florestál Viqueque halo apreensaun ai kúbiku lima
Daudaun ne’e Servisu MAP Viqueque destaka ona Guarda Florestál ba postu administrativu lima, hanesan Viqueque villa haat, Lacluta haat, Uatucarbau lima, Uatulari tolu no Ossu tolu.
“Ba oin nafatin kria formasaun atubele hasa’e di’ak liután koñesimentu. Guarda sira-ne’ebé daudaun iha munisípiu Viqueque seidauk sufisiente tanba área jeografia munisípiu Viqueque kilómetru 1.872,7 no Viqueque mós sai sentru produsaun ai, tanba ne’e ami sente katak ba futuru presiza aumenta Guarda hodi bele kobre área ne’ebé la konsege kobre,” nia akresenta.
Iha fatin hanesan, Xefe CGF MAP, João das Ci Manu dos Reis, dehan, Departamentu Guarda Florestál nasionál oferese formasaun kona-ba knaar Korpu Guarda Florestál, extensionista no tékniku halo viveiru, halo to’os permanente inklui tékniku sukat ai hodi hatene kúbiku ai nian.
“Guarda Florestál ninia funsaun hanesan Polísia limitadu bainhira sira sukat ai hotu. Depois sura kúbiku ai mak fó lisensa konsumidór atu tula ai. Ho nune’e sira hatene uza sira-nia kompeténsia hanesan Polísia limitadu hodi kontrola ai sira-ne’ebé komunidade tula. Karik komunidade tula maka la liu lisensa, maka tenke selu taxa ba Estadu,” nia tenik.
Jornalista : Vitorino Lopes da Costa
Editora : Julia Chatarina
