PLP-KHUNTO apoiu altera pensaun vitalísia iha lejislatura daneen

DILI, 23 juñu 2023 (TATOLI)–Deputadu hosi bankada Partidu Libertasaun Populár (PLP) no KHUNTO ne’ebé sai opozisaun iha lejislatura daneen ne’e, sei apoia lei pensaun vitalísia.
Notísia Relevante: Maria Fernanda Lay: ’’Pensaun vitalísia bele hamoos laiha buat ida’’
Deputadu bankada KHUNTO iha Parlamentu Nasionál (PN), António Verdiál de Sousa, hateten KHUNTO apoia altera lei pensaun vitalísia iha lejislatura daneen.
“Presiza boa-vontade hosi Deputadu hotu-hotu iha uma demokrásia ida-ne’e, maibé hanesan bankada opozisaun ami iha vontade di’ak, maibé presiza tenke iha konsesu polítiku,” Deputadu Verdiál hateten ba jornalista sira iha uma fukun Parlamentu Nasionál, sesta ne’e.
Nia hatutan, atu altera pensaun vitalísia maibé nafatin trata órgaun soberania ne’e ho nia dignidade tomak.
“Klaru, ita sei haree didi’ak la’ós lakohi, ami hakarak. Maibé, ha’u hakarak hateten Deputadu hosi bankada KHUNTO só iha Depuatu na’in-lima (5), ami laiha problema. Karik, bankada maiória hakarak altera lei pensaun vitalísia ne’e ami prontidaun atu apoia,” nia hateten.
Deputadu hosi bankada opozisaun iha lejislatura daneen ne’e aseita ho proposta lei ne’ebé iha lejislatura dalimak hala’o ona diskusaun maibé labele finaliza nune’e kaduka, ne’ebé atu pensaun vitalísia integra ba seguransa sosiál maibé presiza diskute didi’ak hodi presiza dignifika órgaun soberania.
“La’ós halakon total, lae. Ita mós tenke dignifika ema iha umanidade nia laran. Nia kuandu tinan atu reforma klaru, ita tenke fó reforma ba ema ne’e, la’ós tuir ita-nia hakarak tenke halakon total, ne’e lae. Lei ne’e atu integra ba seguransa sosiál, ida-ne’e mak ita tenke ko’alia,” nia hateten.
Deputada PLP, Maria Angelina Sarmento, hateten PLP hanesan partidu dahuluk defende halakon pensaun vitalísia desde inísiu.
“Ba asuntu pensaun vitalisa ne’e atu dehan katak sé mak primeiru foti isue ne’e sai ne’e PLP. Iha tinan 2017, PLP nia kampaña hodi halo votante rihun 60 vota ba PLP, tanba PLP hakarak halakon pensaun vitalísia,” nia dehan.
Nia dehan, aohin partidu sira seluk mós ko’alia ida ne’e, embora iha lejislatura ba kotuk PLP iha kadeira walu de’it, maibé asuntu ne’e PLP ko’alia no foti iha plenária tenke iha rejime jurídiku ida-ne’ebé tenke substitui lei pensaun vitalísia atu pensaun vitalísia ida-ne’e halakon iha sosiedade.
Maibé, iha fim fevereiru tinan ne’e kuandu Ministéiru Solidariedade Sosiál (MSSI) lori rejime lei ida-ne’e mai debate iha Parlamentu la hetan apoiu hosi Deputadu sira.
“Entaun, se agora bankada balun hakarak foti insiativa hodi halakon pensaun vitalísia, klaru ami apoiu, tanba inisiativa ne’e hosi ami dezde inísiu. Ohin loron, sira hateten sira mós hakarak halakon, uluk sira lakohi, só ami de’it mak ko’alia,” nia hateten.
Entretantu, Prezidente Parlamentu Nasionál eleita ba lejislatura daneen períodu tinan lima 2023-2028, Maria Fernanda Lay, promote iha mandatu sei fó prioridade ba altera pensaun vitalísia.
Iha reuniaun plenária dahuluk lejislatura daneen iha loron 22 juñu ne’e, bankada maiória parlamentár hosi CNRT ho kadeira 31 no Partidu Demokrátiku (PD) ho kadeira neen (6), ne’ebé iha forsa maiória parlamentár iha lejislatura daneen hamutuk kadeira 37, propoin kandidatu deputada hosi bankada CNRT ba Prezidente Parlamentu Nasionál, liu husi eleisaun votu sekretu eleitu ho votu afavór 45 kontra 0, abstensaun 19 no branku ida.
Enkuantu bankada opozisaun FRETILIN ho kadeira 19, KHUNTO lima no PLP haat.
Jornalista : Nelson de Sousa
Editór : Cancio Ximenes

