VIQUEQUE, 23 juñu 2023 (TATOLI)—United Nations Development Programme (UNDP) oferese projetu reabilitasaun irrigasaun Belia 1 no Belia 2 iha suku Matahoi, postu administativu Uatolari, munisípiu Viqueque ho kustu $74.948,96, ba Administrasaun Viqueque, iha tinan ne’e.
“UNDP fó projetu rua ba ami hodi halo reabilitasaun irrigasaun rua. Projetu rua ne’e daudaun iha ona prosesu konkursu no sei implementa iha tinan 2023,” Administradór munisípiu Viqueque, Januário Soares ‘Bolly’, informa iha ninia knaar fatin, Administrasaun munisipál, Beloi, sesta ne’e.
Notísia relevante : Irrigasaun Daradau iha suku Vessoru Viqueque funsiona ona ba natar ektare 340
UNDP oferese ona projetu rua ne’e iha tinan 2022, maibé tanba liuhosi prosesu naruk nune’e foin atu implementa iha tinan 2023.
“Iha ona empreza manán-na’in ba projetu rua, ne’ebé tempu badak hahú halo implementasaun hodi fornese bee ba natar sira iha Uatolari. Maski daudaun ne’e komunidade kontinua halo natar, maibé kondisaun irrigasaun nia a’at hela, tanba ne’e liuhosi apoiu doadór sira ne’e, ita bele hadi’a irrigasaun atu agrikultór sira bele halo natar nafatin,” nia akresenta.
Irrigasaun Belia 1 no Belia 2 fornese bee hosi mota Belia bá natar ektare 442, ne’ebé lokaliza iha área suku Matahoi.
Jornalista : Vitorino Lopes da Costa
Editora : Julia Chatarina
