DILI, 23 juñu 2023 (TATOLI)—Sekretaria Estadu Kooperativa (SEKoop) sei komemora loron mundiál kooperativa iha loron 01 jullu 2023 ho tema ‘parseria ba dezenvolvimentu sustetável hamutuk harii mundu ida di’ak liu’.
“Tema ne’ebé iha hanesan tema mundiál ba kooperativa hotu iha mundu uza hodi komemora loron kooperativa, signifika hosi tema ne’e haree ami-nia programa sira ne’e kabe ba tema ne’e ka lae, hosi ne’e mak ita haree ita-nia planu sira ba futuru nian,” Sekretáriu Estadu Kooperativa, Elizário Ferreira, informa ba Agência Tatoli, via telefónika, sesta ne’e.
Nia konsidera, tema ba tinan ne’e importante tebes tanba daudaun ne’e parte kooperativa iha mundu deklara ona kooperativa ‘go internasionál’.
“Maibé Timor-Leste seidauk bele tanba sei iha faze hanaran organizasaun, oinsá atu iha programa dijitalizasaun, katak ema bele sente katak atu asesu kooperativa ne’e fasil. Ita fó ezemplu, iha nasaun Japaun, membru kooperativa bainhira atu asesu kréditu la presiza ba to’o kantor, maibé liuhosi telefone ka online de’it bele asesu ona. Ida-ne’e agora ita mós esforsu hela, nune’e iha futuru mai bele iha mudansa,” nia akresenta.
Notísia relevante : SEKoop estabelese ona loja kooperativa 10 resin iha munisípiu sira
Ba kestaun ne’e, Timor-Leste liuhosi SEKoop halo hela kooperasaun ho Uniaun Europeia, ho kolaborasaun serbisu ho United States Agency for International Development (USAID) halo hela formasaun kona-ba programa dijitalizasaun ba kooperasaun kréditu sira atubele estabelese programa.
Tuir governante ne’e, loron mundiál kooperativa kada tinan sempre komemora tanba ema hatene katak Timor-Leste adere ba aliansa kooperativa internasionál desde iha tinan 2013. Nune’e, movimentu kooperativa sempre selebra loron kooperativa iha loron 01 jullu.
“Atividade ne’ebé ita sei halo hodi komemora loron mundiál ne’e mak halo semináriu hodi komemora hamutuk, ko’alia ba malu kona-ba tema ne’ebé mak iha no hato’o mensajen balun oinsá mak kooperativa bele asegura sustentabilidade instituisionál movimentu kooperativa nian no asegura estabilidade finanseira no estabilidade ekonómiku membru sira,” Elizário tenik.
Tema sentrál ne’ebé tinan ne’e kooperativa mundiál uza hodi komemora loron kooperativa, tanba sai hanesan prioridade ne’ebé mak bele asegura katak ba futuru ne’e kooperativa tenke sai duni instituisaun ne’ebé mak intermediáriu ba asesu finanseiru iha rai ida-ne’e.
“Tuir relatóriu inkluzasaun finanseiru banku sentrál, hateten katak setór kooperativa kontribui 94% ba asesu finanseiru. Ida-ne’e hatudu katak kooperativa mós kontribui hotu,” nia orgullu.
Jornalista : Arminda Fonseca
Editora : Julia Chatarina
