DILI, 26 juñu 2023 (TATOLI)—Prezidénsia Repúblika hasai ona konvite ba bainaka espesiál sira, liu-liu bainaka internasionál, ne’ebé daudaun ne’e iha ona partisipante balun konfirmadu partisipa iha serimónia tomada pose ba membru IX Governu Konstitusionál, iha resintu Palásiu Bairru Pité, iha loron sábadu (01/07).
“Ita konvida bainaka internasionál sira lubuk ida maibé ne’ebé konfirmadu iha na’in 100-resin. Bainaka sira ne’ebé ita konvida hosi nasaun ne’ebé nu’udar membru ASEAN. Aleinde ne’e hosi Portugal, Austrália, no Nova Zelándia,” Adjunta Xefe Kaza Sivíl Prezidénsia Repúblika, Hendriqueta Maria da Silva, informa ba jornalista sira, iha Palásiu Prezidénsiál, Bairru Pité, segunda ne’e.
Notísia relevante : PR Horta hakarak povu partisipa tomada pose ba membru IX Governu
Koordenadora Jerál Komisaun ne’e dehan, hosi konvite sira ne’e, nasaun Nova Zelándia de’it mak seidauk iha konfirmasaun ruma, maibé Indonézia konvite ba Prezidente Repúblik, Joko Widodo la disponível partisipa no sei reprezenta hosi Ministru Koordenadór Asuntu Marrítima no Investimentu, Luhut Pandjaitan, bainaka hosi Indonézia seluk ne’ebé konfirmadu partisipa mak Antiga Ministra Asuntu Marrítima no Peska, Susi Pudjiastuti, Governadór Nusa Tenggara Timur (NTT), Victor Laiskodat, inklui delegasaun balun hosi Bali.
Konvida mós Primeiru-Ministru Singapura, Lee Hsien Loong, maibé tanba sei la marka prezensa sei reprezenta hosi Ministru Negósiu Estranjeiru, Vivian Balakrishnan, no seluk tan.
“Konvidadu internasionál sira-ne’e barak liu hosi Indonézia, konvidadu balun hanesan pedidu hosi Prezidente Repúblika rasik, no balun sira mak hakarak mai duni, kuandu ita iha ona Governu definitivu sira mai halo investimentu, entaun nu’udar investidór sira hakarak partisipa iha eventu ne’e,” nia haktuir.
Aleinde ne’e, sei partisipa mós hosi aktór, produtór no ativista Indonézia, Herlina Christine Natalia Hakim ho ninia ekipa sei halo filmazen iha Timor, no jornalista Kompas, Rosianna Silalahi ho ninia ekipa.
“Tomada pose ne’e nu’udar eventu Estadu ida, tanba ne’e maka Prezidénsia mak lidera prosesu maibé envolve mós instituisaun Estadu seluk, liuliu Governu hodi forma komisaun ida,” Koordenadora Jerál Komisaun esplika.
Jornalista : Antónia Gusmão
Editora : Julia Chatarina
