VIQUEQUE, 26 juñu 2023 (TATOLI)–Médiku espesialista hamutuk 74 hosi Hospital Nacional Guido Valadares (HNGV), segunda ne’e, fó konsulta masál jerál ba abitante sira aldeia Ulussu, suku Matahoi, postu Uatulari, munisípiu Viqueque.
Diretór Ezekutivu HNGV, Alito Soares, esplika, atividade fó konsulta masál jerál ba abitante sira iha área rurál, iha ámbitu komemora aniversáriu HNGV ba da-20, ne’ebé sei monu iha loron 29 juñu 2023.
“Ohin ami hahú fó atendimentu konsulta ba abitante iha área rurál ho objetivu atu lori ekipamentu, medikamentu no médiku espesialista hakbesik ba abitante sira. Ami lori servisu espesializada ba abitante sira-ne’ebé dook hosi fasilidade saúde, ami mós halo detesaun sedu ba moras krónika no reumátika iha labarik sira-nia fuan, screaning ho raiu-x ba moras tuberkuloze, rins, kankru no seluk tan. Médiku sira kompletu iha ne’e hodi halo atendimentu,” Diretór Ezekutivu Ospitál Nasionál informa ba Agência Tatoli, iha aldeia Ulussu.
Notísia relevante : HNGV sei menus rekursu umanu no ekipamentu
Médiku espesialista kompostu hosi matan, tilun, opstetraria, pediatria, kardiolojia (fuan), medisina interna, psiquiatria, kulit no ekipa radiolojia ba pulmaun.
“Ekipa sira to’o iha Ulussu horikalan, ne’ebé ohin hahú halo atendimentu iha tuku 08:00 to’o 09:00. Konsulta ne’e ami sei halo durante loron-tolu, maibé horikalan maka ami to’o, ne’ebé atendimentu to’o tersa aban. Iha konsultasaun matan, médiku espesialista sira distribui oklu matan ba abitante sira-ne’ebé haree letra la moos. Karik iha konsultasaun ne’e ami identifika moras sira-ne’ebé labele kura iha ne’e, ami sei koordena hodi lori pasiente bá nasionál atu kontinua halo tratamentu,” nia akresenta.
HNGV realiza atividade ne’e ba dala-lima ona, antes ne’e realiza ona iha Lau-Ana, Uaimori, Kasa Ainaru, Lequidoe Aileu no Ulu-Su’u Viqueque.
Iha fatin hanesan, Xefe suku Mataho, António Amaral, agradese ba ekipa médiku hosi HNGV, ne’ebé deside mai aldeia Ulu-Su’u hodi fó atendimentu ba populasaun sira-ne’ebé hela iha foho Matebian nian hun.
“Agradese ba médiku espesialista sira-ne’ebé mai fó konsulta ba ha’u-nia populasaun iha suku Matahoi inklui populasaun iha suku Uaitame, Macadique no suku Babulu ne’ebé hela besik iha aldeia Ulu-Su’u. Ha’u hanoin konsulta ne’e fó vantajen di’ak tebes ba populasaun sira tanba sira-ne’e dook hosi sentru saúde, Ospitál Internamentu Viqueque inklui Ospitál Referál,” nia hato’o.
Iha biban ne’e, Autoridade suku husu ba abitante sira-ne’ebé hela besik iha área Ulu-Su’u atu hakbesik-an hodi halo tratamentu ba moras. Médiku sira sei fó konsulta to’o tersa (27/06).
Nune’e mós, Abitante aldeia Ulu-Su’u, Paulino Freitas Menezes, sente haksolok tanba médiku sira bele mai direta fó konsulta ba abitante sira.
“Ha’u sente kontente tebes tanba ohin ami bele halo konsulta ba ami-nia moras sira direta ba médiku espesiliazadu tanba ami hela liu iha área rurál, susar atu asesu sentru saúde sira iha vila,” nia tenik.
Tuir observasaun jornalista Agência Tatoli iha terrenu, nota katak abitante katuas no ferik halo hotu konsulta ba sira-nia moras.
Jornalista : Vitorino Lopes da Costa
Editora : Julia Chatarina
