DILI, 26 juñu 2023 (TATOLI)—Prezidente Parlamentu Nasionál (PPN), Maria Fernanda Lay, husu bankada parlamentár sira iha Parlamentu Nasionál atu hato’o lista kompozisaun meza bankada.
Notísia Relevante: Maria Fernanda Lay feto dahuluk lidera lejislatura daneen
“Hakarak hato’o ba bankada parlamentár atu aprezenta por eskritu, hodi indika ita-boot sira-nia Deputadu sira-ne’ebé sei kompoe bankada ba Prezidente ida no Vise Prezidente rua. Ne’ebé, husu ita-boot sira atu hato’o antes fim do dia,” Maria Ferenanda Lay hateten liuhosi reuniaun plenária PN, segunda ne’e.
Tambá, tuir nia, iha posibilidade ajenda konvoka enkontru konferénsia lidér bankada hodi haree atividade lubun ida-ne’ebé sei hala’o tuir mai, nune’e meza PN husu bankada parlamentár atu hato’o lista Deputadu kompoen iha meza bankada.
Tuir Rejimentu Parlamentu Nasionál (RPN) iha artigu 11(Konstituisaun no Organizasaun), iha alínea 2 hateten; Atu konstituisaun bankada parlamentár ida-idak tenke hato’o komunikasaun eskrita ba Prezidente Parlamentu Nasionál, ne’ebé asina hosi Deputadu sia-ne’ebé hola parte no indika bankada nia Prezidente no Vise Prezidente, karik iha.
Deputada KHUNTO, Olinda Guterres, hateten bankada KHUNTO iha PN lejislatura daneen ne’e hosi partidu rasik nafatin fó konfiansa ba nia sai hanesan Prezidente bankada KHUNTO iha Parlamentu Nasionál.
“Hanesan ha’u uluk iha lejislatura dalimak hanesan Prezidente bankada no agora mós ami-nia Konsilleiru Másimu Partidu KHUNTO hato’o ona mai ha’u katak, agora mós nafatin hanesan xefe bankada ho vise Deputadu António Verdiál,” nia dehan.
Deputadu CNRT, Patrocínio Fernandes, hateten hosi parte bankada CNRT ba asuntu hili Prezidente bankada ho vise ne’e seidauk ko’alia no iha loron ida ka rua tan sei ko’alia, hafoin sei haruka lista naran ba meza PN.
Entretantu, hosi parte bankada FRETILIN, tuir nota ne’ebé Agencia Tatoli asesu hosi pajina bankada nian iha semana kotuk, hosi parte Deputadu sira iha bankada rasik hili ona Prezidente bankada FRETILIN foun mak Aniceto Longuinhos Guterres Lopes no Vise Prezidente bankada mak na’in rua hanesan Deputadu David Dias Ximenes ‘Mandati’ ho Maria Angélica Rangel.
Partidu Libertasaun Populár (PLP) nian, antes ne’e, Deputada Maria Angelina Sarmento hato’o katak hosi parte Deputadu bankada no desizaun partidu nian hili ona nia (Maria Angelino Samento) mak sai hanesan Prezidente bankada PLP iha lejislatura daneen.
Hosi parte bankada Partidu Demokrátiku (PD), jornalista Agência Tatoli seidauk konfirma kona-ba Prezidente bankada ho vise foun.
Antes ne’e, iha 22 juñu liu ba, Parlamentu Nasionál (PN) realiza reuniaun dahuluk lejislatura daneen hodi fó pose ba Deputadu foun sira.
Iha lejislatura daneen ne’e, partidu lima mak hetan asentu parlamentár hanesan CNRT ho kadeira 31, FRETILIN kadeira 19, PD kadeira neen (6), KHUNTO kadeira lima (5) no PLP ho kadeira haat (4).
Notísia Relevante: Maria Angelina Sarmento sai Xefe Bankada PLP iha PN
Jornalista : Nelson de Sousa
Editór : Cancio Ximenes
