OÉ-CUSSE, 27 juñu 2023 (TATOLI) – Prezidente Asosiasaun Boxe, Maximiano Neno, eleitu ba Prezidente Konfederasaun Desportu Timor-Leste (CDTL, sigla portugés) ba períodu tinan haat 2023 to’o 2027 iha Rejiaun Administrativa Espesiál Oé-Cusse Ambeno (RAEOA).
Dionísio Taek mak dirije meza asembleia jerál nu’udar prezidente meja no Raimundo Elo nu’udar sekretária meja asembleia.
Sekretáriu meja asembleia, Raimundu Elo, anunsia rezultadu asembleia estabelesimentu akta eleisaun estrutura CDTL Oé-Cusse, ne’ebé haktuir iha estatutu CDTL nasionál nian, ho lala’ok votasaun sekreta liuhosi delegadu sira hamutuk na’in-24 reprezenta asosiasaun 12 no asosiasaun ida la partisipa.
Votasaun iha asembleia jerál ne’e, hamosu pakote rua, pakote A lidera hosi Maximiano Neno, nu’udar Prezidente CDTL no Raimundo Elo nu’udar Vise-Prezidente CDTL. Pakote B lidera hosi Constâncio Suni nu’udar Prezidente ho Maiximiano Neno nu’udar Vise-Prezidente.
Liuhosi eleisaun sekreta liuhosi votasaun demokratikamente no rezultadu pakote A mak manán ho votu 13 no pakote B 11.
“Nune’e Maximiano Neno, eleitu Prezidente CDTL ho nia Vise Raimundo Elo, meza asembleia deklara katak asembleia estabelesimentu estrutura CDTL Oé-Cusse ba períodu tinan haat 2023 to’o 2027, rezultadu válidu no remata ho asina akta,” Sekretáriu meja asembleia, Raimundu Elo, fó-sai rezultadu eleisaun, ne’ebé realiza iha salaun Dominikana, Oé-Cusse, tersa ne’e.
Akta kona-bá konsellu fiskál no konsellu jurídiku CDTL iha nivél rejionál, realiza ona asembleia jerál hodi estebelese órgaun fiskál no konsellu jurídiku períodu tinan haat nian.
Ho nia asaun hodi aprova rejimentu asembleia no akta eleisaun CDTL Oé-Cusse, ne’ebé haktuir iha estatutu CDTL nasionál, ho nia lala’ok hanesan votasaun sekreta liuhosi delagadu 24 mai hosi aosiasaun 12 ne’ebé ejiste iha Oé-Cusse.
Iha asembleia ne’e hamosu pakote rua, pakote A lidera hosi Julio Coel ho Baptista Punef no pakote B lidera hosi Mario Muni Salu nu’udar Prezidente Konsellu juridiku ho Julio Coel nu’udar Prezidente Konsellu fiskál.
Rezultadu votasaun pakote A ho pakote B hetan rezultadu hanesan hetan votu 12, nune’e asembleia konkorda hodi hakat ba faze daruak, no rezultadu pakote A hetan votu 11 no pakote B hetan votu 11 votu nulu iha rua.
Tanba nafatin rezultadu hanesan, tenke hakat fali ba eleisaun faze datoluk nian, no rezultadu ikus hatudu pakote B manán hotu votu 12 no pakote A hetan votu 9 no votu nulu 3.
“Nune’e Mário Muni Salu eleitu enu’udar Prezidente Konsellu Jurídiku no Júlio Coel eleitu nu’udar Prezidente Konsellu Fiskál, meja asembleia deklara katak, asembleia estabelesimentu CDTL RAEOA ba períodu tinan haat 2023 to’o 2027 válidu no remata ho asina akta,” nia fó-sai.
Iha biban ne’e, Prezidente CDTL Nasionál, Mario Floriano Sanches, esplika ba delegadu katak, prosesu no mekanizmu hatudu ona nia rezultadu liuhosi pakote.
“Ida-ne’e maka kna’ar ohin ita halo ona, rezultadu ohin ne’e prova mai ha’u, katak ha’u-nia mandatu to’o 2025, ha’u bele rai hela fondasi no legasi ida, nune’e CDTL tuir mai bele la’o tuir, tanba desportu ida de’it fair-play lakon manán nafatin hakuak malu, hakat ba oin nafatin atu dezenvolve asosiasaun sira atu lori fini atleta di’ak atu komprova ita-nia rai,” nia katak.
Entretantu, partisipa iha asembleia ne’e mai hosi asosiasaun desportiva 12 ho partisipa na’in-24 kada asosisaun reprezenta ema na’in-rua.
Maka hanesan Asosiasaun Futeból Oé-Cusse (AFO), Asosisasaun Voleiból Oé-Cusse Ambeno (AVOA), Asosiasaun Xadres Atoni Oé-Cusse (AXAO), Asosiasaun atletizmu, Asosiasaun Badminton Rejiaun Oé-Cusse (ABRO).
Nune’e Asosiasaun Karate-do, Asosiasaun Taekwondo, Asosiasaun Siklizmu, Asosiasaun Basketeból, Asosiasaun Kurida-kuda, Asosiasaun Motor-Kroos (LTA), Asosiasaun Boxing.
Notísia relevante: Asosiasaun 13 iha Oé-Cusse realiza asembleia estabelese estrutura CDTL
Jornalista : Abílio Elo Nini
Editór : Evaristo Soares Martins
