VIQUEQUE, 28 juñu 2023 (TATOLI)-–Administradór munisípiu Viqueque, Januário Soares ‘Bolly’, kuarta ne’e, asina akordu kooperasaun ho tékniku hosi Organizasaun Naun Governamentál, To’os ba Moris Di’ak (TOMAK) ba faze II tinan 2023-2024 kona-ba implementasaun atividade agrikultura.
“Ami asina akordu kooperasaun ho Autoridade hodi asegura katak atividade TOMAK sai koordenadu no informadu ba implementasaun no progresu sira. Iha implementasaun faze daruak ne’e, tinan kotuk ami halo ona sosializasaun iha suku hodi informa ba planu implementasaun. Ha’u hakarak afirma katak TOMAK iha kompromisu asegura implementasaun atividade sira,” Xefe ekipa TOMAK, Renato Zrnic, hateten liuhosi ninia diskursu iha serimónia asina akordu, iha salaun administrasaun munisipál, Beloi.
Notísia relevante : Taur promete investe iha setór agrikultura no kria kondisaun dignu ba OPS
Nia dehan, TOMAK sei nakloke ba abitante Viqueque no sei valoriza hanoin sira perante implementasaun setór agrikultór iha munisípiu Viqueque.
Aleinde ne’e, programa TOMAK no Ministériu Agrikultura no Peska (MAP) foin lalais ne’e asina ona akordu kooperasaun téknika hodi reforsa kooperasaun konjunta ba implementasaun programa faze daruak, nune’e atu hametin liután kooperasaun di’ak ho Governu Timor-Leste liuhosi MAP no Administrasaun munisipál sira hodi fó apoiu tékniku no ajuda komunidade inklui agrikultór sira hasa’e kualidade produsaun di’ak liután.
“Ami implementa atividade sira no kada trimestre sei relata progresu programa ba Autoridade, ne’ebé durante ne’e serbisu hamutuk ho komunidade agrikultór sira,” nia akresenta.
Iha biban hanesan, Administradór munisípiu Viqueque, Januário Soares ‘Bolly’ agradese ba TOMAK nia apoia, liu-liu serbisu hamutuk ho parte Servisu Agrikultura no Peska, Diresaun Seguransa Alimentár Viqueque no Servisu Saúde atu hadi’a produsaun agríkola no hadi’a nutrisaun.
“Apoia sira-ne’e importante hodi implementa programa agrikultór iha suku tuir alvu sira no kontinua implementa atividade ne’ebé antes ne’e realiza ona iha tinan 2022-2023 no sei kontinua to’o 2024. Espera katak TOMAK bele implementa programa iha área agrikultura, alimentár no saúde ho di’ak,” nia hato’o.
Jornalista : Vitorino Lopes da Costa
Editora : Julia Chatarina
