Koordenadora Rezidente ONU felisita Prezidente PN Maria Fernanda Lay
DILI, 28 juñu 2023 (TATOLI)—Koordenadora Rezidente Nasaun Unida (ONU) iha Timor-Leste, Funmi Balogun, felisita Deputada Maria Fernanda Lay nu’udar feto dahuluk sai Prezidente Parlamentu Nasionál ba lejislatura daneen iha períodu 2023-2028.
Notísia Relevante: Maria Fernanda Lay feto dahuluk lidera lejislatura daneen
“Entuziasmu tebes hasoru malu ho Prezidente Parlamentu Nasionál hodi felisita feto dahuluk Prezidente Parlamentu Nasionál, dezeja susesu,” Koordenadór Rezidente Nasaun Unida (ONU) ne’e hateten ba jornalista sira hafoin ramata enkontru ho Prezidente Parlamentu Nasionál, iha PN, kuarta ne’e.
Koordenadór Rezidente Nasaun Unida (ONU) ne’e hateten, durante seru mutu ne’e nia parte ho Prezidente Parlamentu Nasionál ko’alia kona-ba oportunidade no poténsia dezáfiu, nune’e saida mak Prezidente Parlamentu sei halo PN nu’udar órgaun soberania daruak ne’ebé reprezenta timoroan tomak.
Nia dehan, Prezidente PN hanesan mentora no modelu ba feto Timor-Leste, bele haree nia lideransa no uza hanesan oportunidade hodi partisipa iha polítika.
Durante enkontru, sira diskute oportunidade hotu ne’ebé PN iha, inklui ninia funsaun supervizaun hodi garante Governu kumpre ninia promesa iha kampaña.
“Ko’alia kona-ba oportunidade hotu ne’ebé Parlamentu iha hodi garante partidu hotu ne’ebé reprezenta iha Parlamentu no Governu, partikularmente promesa durante kampaña eleitorál hodi kumpre,” nia hateten.
Iha parte seluk, Funmi Balogun, hateten PNUD presta apoiu ba Parlamentu Nasionál durante tinan barak ona hodi reforsa la’ós de’it sira-nia kapasidade, maibé mós sira-nia funsaun hanesan fiskalizadór hodi garante Governu gastu orsamentu ba forma Loos hodi benefísia duni povu Timor-Leste.
Enkuantu, iha 22 juñu liu ba, Deputadu Parlamentu Nasionál iha lejislatura daneen hamutuk 65 simu pose no juramentu, no Deputada Maria Fernanda Lay hosi bankada CNRT eleita ba Prezidente Parlamentu Nasionál periódu 2023-2028.
Maria Fernanda Lay hanesan kandidatu únika ne’ebé propoin hosi partidu koligasaun CNRT no Partidu Demokrátiku (PD).
Jornalista : Nelson de Sousa
Editór : Cancio Ximenes
