DILI, 28 juñu 2023 (TATOLI)—Prezidente Repúblika (PR), José Ramos Horta, informa, rezultadu hosi vizita Estadu ba Alemaña hatudu rezultadu di’ak tanba Governu Alemaña autoriza traballadór timor-oan hodi serbisu iha Alemaña.
Xefe Estadu hala’o vizita Estadu bá Alemaña iha loron 24 juñu hodi halo reuniaun ho Prezidente Repúblika, Frank-Walter Steinmeier, no Primeiru-Ministru, Olaf Scholz.
Horta haktuir, Alemaña durante ne’e halo avaliasaun estratejia prioritária inklui tau konsentrasaun bilaterál ba Kontinente Áfrika tanba problema boot iha ne’ebá. Sira hanesan nasaun iha Kontinente Europa, hanesan liña frente ne’ebé simu refujiadu hosi Áfrika Norte.
“Entaun sira deside konsentra liu ba programa Áfrika Norte. Ba Timor-Leste sira kontinua apoia maibé liuhosi Uniaun Europeia no la halo ona kooperasaun diretamente ho Governu. Maibé hahú kedas tinan kotuk liubá, ho vizita deputadu Alemaña hasoru ha’u, maka iha outubru 2022 ha’u hateten ba sira katak ha’u hakarak haree programa espesiál ida entre Alemaña no Timor-Leste, ida maka simu traballadór timor-oan ho pasaporte Timor, ida-ne’e sira konkorda tanba foin daudaun mós sai ona lei ida iha Alemaña katak permite duni laiha diskriminasaun ba nasaun ne’ebé hakarak haruka traballadór serbisu iha ne’ebá,” PR Horta hateten hafoin fila hosi vizita ofisiál iha Alemaña, iha Aeroportu internasionál Prezidente Nicolau Lobato, Comoro, kuarta ne’e.
Notísia relevante : Governu Alemaña apoia $390.000 ba CNC, I.P hodi hadi’a muzeu antigu Komarka Balide
Maibé Xefe Estadu fó atensaun katak tenke iha akordu formál ho Governu Alemaña hodi tau Timor-Leste iha programa ne’ebé simu traballadór estranjeiru ho pasaporte Timor inklui presiza halo mós formasaun tékniku profisionál.
“Ha’u husu mós ba sira atu tulun eskola tékniku profisionál sira iha Timor-Leste hanesan Fatumaka atubele atualiza kuríkulu eskola sira no apoia ekipamentu, formasaun profisionál, aleinde halo iha Timor-Leste, halo mós iha Alemaña,” nia tenik.
Horta kompromete katak sei halo kontaktu direta ho empreza sira hodi simu traballadór timor-oan tanba sira tenke iha ona kontratu ho empreza sira.
Nia reafirma, kooperasaun bilaterál nasaun rua durante ne’e la’o di’ak iha área oin-oin.
“Asuntu importante liu ne’ebé ha’u lori bá Alemaña maka kooperasaun bilaterál Alemaña no Timor-Leste. Tanba tinan-20 liubá Alemaña hanesan parseiru importante ida, sira mak fó tulun harii ita-nia setór marrítima, la’ós oferese ró-ahi Berlin Nakroma de’it maibé halo formasaun ba ita-nia ema sira iha setór planeamentu, administrasaun no jestaun iha transporte marrítima,” nia tenik.
Alemaña mós halo kooperasaun bilaterál ho Timor-Leste iha área agrikultura iha postu administrativu Natabora, munisípiu Manatuto.
Jornalista : Antónia Gusmão
Editora : Julia Chatarina
