iklan

NASIONÁL, HEADLINE, POLÍTIKA

PR Horta prefere membru Governu foun ho esperiénsia profisionál

PR Horta prefere membru Governu foun ho esperiénsia profisionál

Prezidente Repúblika, José Ramos Horta. Imajen Tatoli/Francisco Sony

DILI, 28 juñu 2023 (TATOLI)–Prezidente Repúblika (PR), José Ramos Horta, prefere membru IX Governu ne’ebé sei simu pose iha loron 01 jullu 2023 ho esperiénsia profisionál.

“Ha’u dehan ba Maun Xanana haree no estuda didi’ak ema-ne’e nia kurríkulu la’ós de’it akadémiku maibé profisionál, esperiénsia, ne’e primeiru kritériu tanba ema ida bele PhD (doutoramentu) hosi ne’ebé de’it, nia bele PhD maibé laiha esperiénsia, hatene liu de’it teoria. Ha’u koñese ema PhD iha mundu ne’e lubuk ida, depois kuandu sira ba Governu oin seluk fali ona, la’ós buat ne’ebé sira hanorin,” PR Horta hateten hafoin fila hosi vizita ofisiál iha Alemaña, iha Aeroportu internasionál Prezidente Nicolau Lobato, Comoro, kuarta ne’e.

Kritériu seluk ne’ebé PR prefere maka tau ema iha fatin loloos tuir ninia esperiénsia.

“Maun-boot Xanana nu’udar Primeiru-Ministru nia hatene ida-ne’e, nia universidade mak vida ho kakutak apreende lalais, la persiza livru oin-oin maibé nia lee barak durante tempu barak, kakutak mamar loos, ne’ebé nia koñese ema hotu, ida-idak nia esperiénsia,” nia akresenta.

Notísia relevante : Fatin tomada pose IX Governu bele akumula ema to’o 6.000

Xefe Estadu mós prefere estrutura Governu foun ho postura kiik, labele boot demais.

“Ha’u prefere estrutura Governu labele boot demais, ha’u rona Maun Xanana mós uluk ko’alia hakarak Governu ida kiik, ne’ebé ha’u hakarak haree Governu ida kiik maibé ha’u la interfere ida-ne’e no konsentra ba governasaun iha tinan ida-ne’e nia laran, prioridade viajen estranjeiru ruma haree de’it mak asuntu ASEAN katak bainhira iha asuntu ne’e tenke bá duni maibé sira seluk lalika bá, tanba viajen barak demais iha rai-li’ur la konsenta ba ministériu,” nia akresenta.

Aleinde ne’e, Horta sujere, ba mandatu IX Governu iha tinan ida-ne’e, pelu menus laiha ministru ida mak tenke bá rai-li’ur.

“Atu halo follow up buat ruma bele koordena ho Embaixada sira iha rai-li’ur ka Embaixada sira iha Jakarta ka haruka tékniku mak bá, ministru lalika ba,” nia fó hanoin.

Prezidente Repúblika dehan, nia sei fó pose ba membru Governu ida-ne’ebé Primeiru-Ministru hato’o ba nia.

“Primeiru-Ministru mesak-mesak labele governa, tanba ne’e mak iha Governu ida nia iha kompeténsia konstitusionál, legál no úniku iha ita-nia sistema polítiku konstitusionál Prezidente Repúblika la hili membru Governu, Primeiru-Ministru mak hili. Se iha kazu ruma karik iha Tribunál, Primeiru-Ministru rasik hatene, la persija ha’u mak haree fali ida-ne’e, mesmu iha kazu iha Tribunál mós ema ne’e seidauk julgadu, seidauk kondenadu entaun prinsípiu direitu maka inosente to’o provadu kulpadu,” nia salienta.

Iha loron 29 juñu 2023, Primeiru-Ministru indijitadu sei lori lista membru Governu IX ba aprezenta iha Prezidente Repúblika, nune’e iha loron 30 juñu sei publika iha Jornál Repúblika, no iha loron 01 jullu 2023 mak tomada pose ba membru IX Governu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!