iklan

NASIONÁL, HEADLINE, KAPITÁL

Fatin tomada pose IX Governu bele akumula ema to’o 6.000

Fatin tomada pose IX Governu bele akumula ema to’o 6.000

Preparasaun fatin ba tomada pose membru IX Governu, iha Palásiu Prezidensiál, Bairru Pité, tersa (27/06/2023). Imajen Tatoli/Egas Cristóvão

DILI, 27 juñu 2023 (TATOLI)—Vise-Prezidente Koordenadór Jerál ba preparasaun tomada pose ba membru IX Governu Konstitusionál, Tomas do Rosário Cabral, hateten, preparasaun fatin ba serimónia tomada pose atinje ona 90%, ne’ebé fatin ne’e bele akumula ema hamutuk 6.000.

“Ema sei tama iha resintu Palásiu Prezidente Repúblika bele to’o 6.000, tanba konvida mós populasaun sira ne’ebé hela besik iha Dili no Xefe suku sira iha Dili sei hetan hotu konvite, ne’ebé iha programa daruak nian iha ámbitu copo de água ne’e hanesan festa populár ida,” Tomas Cabral hateten liuhosi konferénsia imprensa, iha Palásiu Prezidente, Bairru Pité, tersa ne’e.

Notísia relevante : Bainaka internasionál 100-resin konfirmadu partisipa serimónia tomada pose IX Governu

Vise-Prezidente Koordenadór Jerál ba preparasaun tomada pose ba membru IX Governu Konstitusionál, Tomas do Rosário Cabral, hato’o informasaun kona-ba progressu preparativu serimónia tomada pose ba membru IX Governu, iha Palásiu Prezidensiál, Bairru Pité, tersa (27/06/2023). Imajen Tatoli/Egas Cristóvão

Nia dehan, eventu Estadu ne’e fahe ba programa rua, hanesan serimónia solene maka fó pose ba membruGovernu foun, hafoin ida-ne’e iha serimónia copo de água, no tuir mak iha entrevista ho Primeiru-Ministru foun hosi mídia internasionál Kompas TV ho lian Indonézia, enkuantu ho mídia BBC no Reuters ho lian inglés, ne’ebé tempu entrevista oras rua, iha salaun Xina, lokaliza iha Palásiu Prezidénsia.

“Entrevista entre mídia Kompas TV, BBC no Reuters ne’e sira mak husu no hetan aseitasaun hosi Prezidente Repúblika, José Ramos Horta no Primeiru-Ministru,” nia akresenta.

Hafoin entrevista, iha animasaun múzika hosi banda múzika Lahane Group no banda sira seluk, iha mós banda múzika hosi Nusa Tenggara Timur (NTT) hodi anima bainaka no povu sira ne’ebé marka prezensa iha eventu ne’e.

“Orsamentu ne’ebé gasta balun mai hosi Primeiru-Ministru indijitadu ho montante rihun $200, restu ne’e mai hosi Governu no Palásiu Prezidensiál rasik, osan sira ne’e gasta ba harii tenda maibé tanba tenda sira Governu nian , nune’e kompleta de’it, restante haree ba ai-han ba festa populár,” nia tenik.

Fó hanoin fali katak, iha loron 29 juñu 2023 Primeiru-Ministru indijitadu sei lori lista membru Governu IX ba aprezenta iha Prezidente Repúblika, nune’e iha loron 30 juñu mak sei publika iha Jornál Repúblika, iha loron 01 jullu 2023 loron tomada pose ba membru IX Governu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!